दमक– झापामा शुक्रबार प्रहरीले १६ क्विण्टल भन्दा वढि गाँजासहित दुई वटा ट्रक र दुई जना मानिस पक्राउ गरेको छ।

बुद्धशान्ति गाउँपालिका–४ स्थित मेची राजमार्गबाट सशस्त्र प्रहरीको टोलीले गाँजा बोकेका ट्रकसहित मानिस पक्राउ गरेको हो।

पक्राउ पर्नेमा इलामको माईजोगमाई गाउँपालिका–२ का ३७ वर्षीय गङ्गा बहादुर बस्नेत र धनकुटाको शहिदभूमि नगरपालिका–४ को महेश राई छन्।

विशेष सूचनाको आधारमा नम्बर १ बराह बाहिनी मुख्यालय र नम्बर २ गण झापा मातहत सुरक्षा वेश टिमाईबाट खटिएको संयुक्त टोलीले इलामबाट झापातर्फ आउँदै गरेको को १ ख ५००१ र प्र १–०२–००२ ख ०५८४ नम्बरको मिनी ट्रक चेकजाँच गरेको थियो।

त्यस क्रममा ५७ वटा बोरामा प्याक गरिएको राखेर १ हजार ६ सय ३६ किलो गाँजा बरामद भएको सशस्त्र प्रहरीले जनाएको छ। पक्राउ परेका वस्नेत र राईको साथबाट ८७ हजार ८ सय ८० रुपैयाँ र ५ थान मोबाइल सेट समेत बरामद भएको जनाईएको छ।

नियन्त्रणमा लिइएकाहरूलाई बरामद गाँजा र ट्रकसहित आवश्यक कारबाहीको लागि सम्बन्धित निकायमा बुझाइएको सशस्त्रका सहप्रवक्ता डीएसपी शैलेन्द्र थापाले जानकारी दिए।