काठमाडौँ– नेपालको सरकार परिवर्तनमा भारतीय चलखेललाई बल पुग्ने गरी अभिब्यक्ति दिएपछि परराष्ट्रमन्त्री आरजु राणा देउवा विवादमा परेकी छिन्। १२ दिने भारत भ्रमणबाट फर्किने क्रममा शुक्रबार त्रिभुवन अन्तर्राष्ट्रिय विमानस्थलमा पत्रकारसँग कुरा गर्दै उनले यस्तो विवादास्पद अभिब्यक्ति दिएकी हुन।

राणाले ५ चैतमा भारतीय विदेशमन्त्री एस जयशंकरसँग भेट गरेकी थिईन। सम्भवतः त्यसै आधारमा भारत यही सरकारको पक्षमा र प्रजातन्त्रको पक्षमा रहेकोमा पत्रकारहरुलाई विश्वस्त पार्न खोजेकी राणाले भनिन् ‘भारत अहिलेको सरकारसँग एकदमै इन्गेज्ड छ। सरकारको सिस्टम नै परिवर्तन हुनेजस्तो आशय मैले देखिनँ।’

उनले अगाडि भनिन्– ‘यहाँको राजनीतिक गतिविधिका बारेमा धेरै कुरा त गरेनौँ । तर, उहाँहरूको सपोर्टचाहिँ डेमोक्र्क्याटिक सिस्टमलाई नै छ भन्ने कुरा उहाँहरूको हरेक गतिविधिबाट हामीले बुझ्न जरुरी छ।’

स्मरणिय के छ भने, भारतले अहिलेसम्म (८ महिना) प्रधानमन्त्री केपी शर्मा ओलीलाई औपचारिक भ्रमणको निम्तो दिएको छैन। जबकि, नेपालमा हरेक प्रधानमन्त्रीको पहिलो विदेश भ्रमण भारत हुने गरेको थियो। तर, भारतले निम्तो नदिएपछि ओलीले आफनो भ्रमण चिनबाट सुरु गरे।

त्यसैले भारत नेपालसँग असन्तुष्ट रहेको र जुनसुकै बेला सरकार ढल्न सक्ने भाष्य निर्माण भएको छ। यीनै आशंकालाई मन्त्री राणाले चिर्ने प्रयास गरकी थिईन। भारतका कारण अहिलेको सरकार खतरामा नरहेको सन्देश दिन खोज्दा उनले भाँती नपु¥याएको कतिपयको बुझाई छ।

परराष्ट्रमन्त्रीको ओहदामा बसेको व्यक्तिले सरकार हेरफेरको विषय भारतीय पोल्टामा रहेको संकेत दिएको भन्दै कतिपय कूटनीतिक र राजनीतिज्ञले उनको आलोचना गरेका छन्। अहिलेको सरकार परिवर्तनमा भारतीय चलखेल नरहेको संकेत दिएर अरु मात्र होइन, आफू पनि आश्वस्त हुन खाजेको उनको अभिब्यक्तिबाट झल्किने उनीहरुको वुझाई छ।

अन्तिम राजा ज्ञानेन्द्र शाह पोखराबाट काठमाडौं फर्किने दिनको अवसर पारेर २५ फागुनमा काठमाडौंमा राजावादीहरूले राजतन्त्र पुनःस्थापनाको पक्षमा ठूलो शक्ति प्रदर्शन गरेका थिए। त्यही प्रदर्शनको भोलिपल्ट राणा भारत भ्रमणमा गएकी थिइन्। निजी काममा भारत भ्रमणमा गएकी राणा भारतीय सरकारको रायसिना डायलगमा एक दिन सहभागी भईन। त्यसको भोलिपल्ट एस जयशंकरसँग भेट गर्नेबाहेक अरु उल्लेखनिय तालिका देखिएको छैन।