काठमाडौँ– पर्साको वीरगञ्ज महानरपालिका–२५ का वडाध्यक्ष आशुतोष चतुर्वेदीमाथि नेपाल प्रहरीका वहालवाला वरिष्ठ सई (प्रहरी नायव निरिक्षक) वरिष्ठ सई सागरशमशेर राणासहित ६/७ जनाको समूहले कुटपिट गरेको छ।

गत २९ फागुनको राति सवा ९ बजे वीरगञ्ज महानगरपालिका–८ स्थित डाइमण्ड पार्टी प्यालेसमा उनीमाथि कुटपिट भएको हो। पार्टी प्यालेसका सञ्चालक वीरेन्द्र पासवानका छोराको बर्थ–डे पार्टीमा गएका वेला आफुमाथि आक्रमण भएको वडाध्यक्ष चर्तुवेदीले वताएका छन्।

सीसीटीभी फुटेजमा पार्टी प्यालेसमा खानपिन भएरहेका बेला एक समूह वडाध्यक्षमाथि आक्रमण आक्रमण गरेको देखिन्छ। फुटेजमा वडाध्यक्ष चतुर्वेदीसहित चार जना खानपानमा व्यस्त रहेको देखिन्छ।

त्यही समयमा निलो ज्याकेट लगाएका व्यक्ति त्यहाँ पुगेपछि ४ मध्ये एक जनाले उठेर निलो ज्याकेट लगाएका व्यक्तिलाई बाहिर पठाउन खोजेको फुटेजमा देखिन्छ। फोनमा कुरा गर्दै आएका ती व्यक्ति बाहिर जान मान्दैनन् र भित्र पस्छन्। उनकै पछिपछि अरू व्यक्ति पनि आएका छन्।

यही बेला अर्को ढोकाबाट अर्को समुह भित्र छिरेर वडाध्यक्ष चतुर्वेदीमाथि आक्रमण गरेको फुटेजमा देखिन्छ। उक्त आक्रमण गर्ने समूहमा नेपाल प्रहरीका बहालवाला वरिष्ठ सई राणासमते रहेको आरोप छ। त्यहाँ दुई पक्षबीच अन्धाधुन्दा आक्रमण हुन्छ। आक्रमणबाट घाइते भएका वडाध्यक्ष चतुर्वेदी उपचारपछि अहिले घर फकिर्एका छन्।

घट्नाका विषयमा वडाध्यक्ष चर्तुवेदीले ४ चैतमा जिल्ला प्रहरी कार्यालय पर्सामा निवेदन समेत दिएका छन्। निवेदनमा नेपाल प्रहरीका वरिष्ठ सई राणा, प्रहरी जवान दिपेश क्षेत्री, वीरगञ्ज–१० कै वडाध्यक्ष सुशील साह कानु, वीरगञ्ज–११ का ४२ वर्षीय भुषण यादव, वीरगञ्ज–३२ का भुसाल चौरसिया, वीरगञ्ज–६ का ३७ वर्षीय विक्की गुप्ता, वीरगञ्ज–१० का लखनलाल गुप्तासहितले आफूमाथि आक्रमण गरेको दाबी चतुर्वेवदीले गरेका छन्।

निवेदन दिएपनि प्रहरीले अहिलेसम्म चासो नदिएको उनको आरोप छ। यसअघि आफूमाथि साइबरको मुद्दा चलेको र त्यहीको बदलाका कारण आक्रमण गरिएको हुनसक्ने वडाध्यक्ष बताउँछन्।

वडाध्यक्षमाथि आक्रमण गरको आरोप लागेका वरिष्ठ सई राणा लामो समय तराईका क्षेत्रमा सादा पोशाकमा बसेर काम गरेका प्रहरी हुन्। हाल उनी काठमाडौं उपत्यका प्रहरी कार्यालय रानीपोखरीमा सादा पोशाकको रूपमै कार्यरत थिए।

मधेश प्रदेशका डीआईजी लालमणि आचार्यले भने घटनाबारे छानबिन भईरहेको बताए।