काठमाडौँ– पूर्वराष्ट्रपति द्वयः रामवरण यादव र विद्यादेवी भण्डारीले अख्तियार दूरुपयोग अनुसन्धान आयोगमा भ्रष्टाचारको उजुरी परेको छ। सिन्धुलीका युवराज सफलले बिहीबार यादव र भण्डारी विरुद्ध उजुरी दर्ता गराएका हुन्।

काठमाडौँमा घर भएपनि घरभाडाबापत उनीहरूले मासिक लाख बढि रकम बुझ्दै आएको भन्दै आयोगमा उजुरी परेको हो। उजुरीमा पूर्वराष्ट्रपति यादव र भण्डारीलाई भ्रष्टाचार कसुरमा पक्राउ गरी छानबिन गर्न माग गरिएको छ। अन्यथा मुद्दा लिएर अदालतसम्म जाने उजुरीमा भनिएको छ।

प्राप्त विवरणअनुसार गत आर्थिक वर्ष पूर्वराष्ट्रपति यादवको भरणपोषणका लागि राज्यकोषबाट ४६ लाख २५ हजार ६१५ रुपैयाँ र भण्डारीका लागि ३५ लाख १८ हजार ५५५ रुपैयाँ खर्च भएको छ। गृहमन्त्रालय स्रोतका अनुसार उक्त रकम तलब, घरभाडा, सचिवालयका सदस्यको तलब, बिजुली, पानीसहितको हो।

पूर्वराष्ट्रपति यादवको बागडोलमा घर भएपछि भाडाको घरमा वस्दै आएका छन् भने भण्डारीको चपली हाइटमा घर छ। उनी त्यहीँ वस्छिन्। यादवलाई घर भाडा बापत मासिक एक लाख ९२ हजार २५५ रुपैयाँमा र भण्डारीका लागि पनि मासिक एक लाखका दरले घर भाडा भुक्तानी भइरहेको छ।

पूर्वराष्ट्रपतिलाई सरकारले एक जना उपसचिव, हलुका सवारी चालक र एक जना कार्यालय सहयोगी दिएको छ। दुवैलाई प्रतिव्यक्ति हरेक महिना २०० लिटरका दरले इन्धनका लागि चार लाख ४ हजार ८८२ दरले भुक्तानी भएको स्रोतले बताएका छ।

यादवका लागि सुविधा दिन २०७३ माघ २० गते र २०७४ मंसिर २५ गते निर्णय भएको छ। भण्डारीलाई २०८० भदौ २९ गतेको मन्त्रिपरिषद्को निर्णयका आधारमा सुविधा दिइएको हो।

यतिमात्रै होईन, मन्त्रिपरिषद्का पूर्वअध्यक्ष खिलराज रेग्मीका लागि सरकारी कोषबाट ८ लाख ६१ हजार ३५७ रुपैयाँ, पूर्व उपराष्ट्रपति परमानन्द झाका लागि ३ लाख ५८ हजार ९५६ रुपैयाँ खर्च गरेको छ। अर्का पूर्वउपराष्ट्रपति नन्दकिशोर पुनले उर्जा मन्त्रालयको बा २ झ ३१४२ नम्बरको गाडी सरकारी सुविधा बापत लिएका छन्।

पूर्वप्रधानमन्त्रीहरु लोकेन्द्रबहादुर चन्द, झलनाथ खनाल, बाबुराम भट्टराईलाई सरकारले एक÷एकवटा गाडी र मासिक १५० लिटर पेट्रोल दिँदै आएको छ। उनीहरुका लागि शाखा अधिकृत स्तरको निजी सचिव पनि उपलब्ध गराइएको छ।

उल्लेखित सुविधासँगै विशिष्ट व्यक्तिहरुले मन्त्रिपरिषद्बाट निर्णय गराएर लाखौँ उपचार खर्चसमेत लिने गरेका छन्। त्यसलाई उनीहरुले पाउने वार्षिक हिसाबमा देखाइएको छैन। त्यस्तै, चार जना पूर्वसभामुखहरुले तारानाथ रानाभाट, कृष्णबहादुर महरा र ओनसरी घर्तीले मासिक एक सय लिटर पट्रोलसहित एक–एक वटा गाडी सुविधा लिएका छन्।

पूर्वसभामुख अग्नि सापकोटाले चीन सरकारले उपहारस्वरुप संसद् सचिवालयलाई दिएको विद्युतीय गाडी सुविधाका रुपमा लिएका छन्।