विराटनगर– ‘नो केबलकार समूह’को समर्थनमा ताप्लेजुङ पुगेका राष्ट्रिय मुक्ति पार्टी (नेपाल)का अध्यक्ष राजेन्द्र महतोलाई ताप्लेजुङका नागरिकले कालोझण्डा देखाएका छन्।

बाहिरी जिल्लाबाट आएर विकासको विरोध र समाज भाँड्ने काममा लागेको भन्दै उनलाई कालो झण्डा देखाईएको हो। नो केवलकार समुहले आयोजना गरेको पदयात्रामा सहभागी बनेर फर्कँदै गरेका महतोलाई सदरमुकाममा कालोझण्डा देखाईएको जनाईएको छ।

जिल्लाको विकासका लागि बनिरहेको केबलकारको विरोधमा विभिन्न जिल्लाबाट पुगेकाहरूको साथमा महतो पनि गएका थिए। उनीविरुद्ध स्थानीयले जिल्लाको शान्ति सुरक्षामा खलल पु¥याउनुका साथै समाज भाँड्ने काम गरेको आरोप लगाएका छन्।

महतो ‘जय पाथीभरा माता’को नारा लगाउँदै जानुको साटो मुर्दावादका नारा लगाउँदै गएको र जिल्ला र समाज भाँड्ने अभिव्यक्ति दिँदै हिँडेका कारण कालो झण्डा देखाइएको स्थानीय सुन्दर लिम्बुले बताए।

पछिल्लो समय नो केबलकार समुहको आन्दोलनमा स्थानीयवासीको समर्थन देखिएको छैन। त्यसैले उनीहरुले वाहिरबाट मान्छे भेला गरेर केबलकार निर्माणको विरोधलाई जारी राखेका छन्।