काठमाडौँ– आइतबार प्रधानमन्त्री केपी शर्मा ओली संसद बैठकबाट बाहिरिँदै थिए। गेटमै बसेका युट्युवरले उनलाई घेरे। प्रश्नको आईरो लाग्यो। कतिपय प्रश्न स्वभाविक थिए, कतिपय अनपेक्षित।

‘सामाजिक सञ्जाल विधेयक ल्याएर तानाशाही प्रवृत्तिमा जाँदै हो सरकार?’ एक युट्युवरले प्रश्न गरे। प्रश्न यतिमा रोकिएन उनले अगाडि सोधे, ‘सामाजिक सञ्जाल नियमन छाडेर नियन्त्रणमा जाँदै हो सरकार?’

अर्का युट्युबरले त्यसमै थपे, ‘ओली सरकार भ्रष्टाचारीलाई जोगाउन लागेको भन्ने आरोप छ नि प्रधानमन्त्रीज्यू। जबाफ दिनुहोस् न।’ हिँड्दै गरेका प्रधानमन्त्रीले रोकिएर प्रतिप्रश्न गरे – आरोप सुन्दा राम्रो लाग्यो होइन? युट्युबरले जबाफ दिए – ‘त्यस्तै देखिन्छ त बाँसबारी छालाजुत्तादेखि लिएर… ’ प्रधानमन्त्रीले फेरि सोधे – त्यस्तै देखियो? युट्युबरले भने– ‘त्यस्तै देखियो।’

त्यसपछि युट्युबरले फेरी सोधे, ‘तानाशाही प्रवृत्ति किन होला प्रधानमन्त्रीज्यू? जबाफ त दिएर जानुहोस्।’ उनको प्रश्नको उत्तर नआउँदै अर्का युट्युबरले सोधे– ‘हिटलर प्रवृत्तिमा जाँदै हो, सरकार?’

यसरी युट्युबरले तानाशाह र हिटलरको आरोप लगाएर प्रश्नमाथि प्रश्न गरेपछि प्रधानमन्त्री असमन्जस्यमा परे। अहिले यो विषयले निकै चर्चा पाएको छ। प्रधानमन्त्रीलाई हिटलर भनेर प्रश्न सोधिएको विषयमा नेकपा एमालेका सांसद सूर्य थापाले सोमबारको प्रतिनिधि सभा बैठकमै आपत्ति जनाए।

उनले संसद सचिवालयको छवि कस्तो बनाउने भन्नेसँग मिडिया व्यवस्थापनको विषय जोडिएको बताए। आफुलाई समेत हनुमान भनेको भन्दै थापाले चित्त दुखाए। ‘मलाई नै बुम ते¥स्याएर तपाईं हनुमान हो भनेर प्रश्न गरियो। सांसदहरूलाई यस्ता प्रश्न गर्न पाइन्छ कि पाइँदैन।’– उनले भने।

त्यसपछि संसद सचिवालयले पनि प्रधानमन्त्रीलाई हिटलरको आरोप लगाउने पत्रकारबारे सोधीखोजी सुरु गरेको छ। प्रधानमन्त्रीलाई हिट्लर भन्ने ब्यक्तिको पहिचान नभएपनि तानाशाही प्रवृत्ति किन ? भनेर सोध्ने व्यक्ति भने पहिचानमा आएका छन्।

उनी हुन– ‘युवा मन नेपाल’ च्यानलका युट्युवर किशोरकुमार श्रेष्ठ। मोरङको उर्लाबारी नगरपालिका –६ घर भएका श्रेष्ठ प्रधानमन्त्री ओलीकै पार्टी नेकपा एमालेका कार्यकर्ता हुन। ०७९ को स्थानीय तहको निर्वाचनमा उनी वडा सदस्यको उम्मेदवार बनेर पराजित भएका थिए। उनले ६३३ मत पाए भने नेपाली कांग्रेसका बमबहादुर श्रेष्ठले १ हजार ९ मत ल्याएर चुनाव जिते।

उनले नै नेकपा एमालेका प्रमुख सचेतक महेश बर्तौलालाई ‘बा को शासनमा छोराहरूको दादागिरी छ नि। प्रहरीमाथि निर्घात कुटपिट हुन्छ। छानबिन हुनुपर्ने पीडक माथि हो तर छानबिन हुन्छ पीडित प्रहरीमाथि। बाको शासनमा छोराहरूको दादागिरी कहिलेसम्म?’ भनेर प्रश्न गरेका थिए। बर्तौला उनको प्रश्नको उत्तर नदिई हिडेका थिए।