काठमाडौँ– सन् २००८ नोभेम्बर २६ मा मुम्बईमा भएको आतंकवादी आक्रमण घटनाका एक अभियुक्तलाई अमेरिकाबाट भारत ल्याउने तयारी भएको छ। अमेरिका ती अभियुक्तलाई सुपुर्दुगी गर्न तयार भएको छ।

भारतका प्रधानमन्त्री नरेन्द्र मोदी र अमेरिकाका राष्ट्रपति डोनाल्ड ट्रम्पबीच बिहीबार ह्वाइट हाउसमा भेटवार्ता भएको थियो। सोही क्रममा ट्रम्पले २६÷११ मुम्बई आक्रमणका अभियुक्तलाई भारत सुपुर्दुगी गर्न अमेरिका तयार रहेको बताएका छन्।

मुम्बईमा भएको आतंकवादी हमलाका एक अभियुक्त तहववुर राना लस एन्जलसको जेलमा छन्। पाकिस्तानी मूलका क्यानाडेली नागरिक हुन्। उनी पाकिस्तानी मूलका अमेरिकन ‘आतंककारी’ डेभिड कोलम्यान हेडलीका निकट पात्र रहेको द हिन्दुस्तान टाइम्सले जनाएको छ।

कोलम्यान मुम्बईमा भएको आतंकवादी आक्रमणको मुख्य योजनाकारमध्येका एक रहेको भनिएको छ। ‘अमेरिका एक हिंस्रक व्यक्तिलाई भारत फिर्ता पठाउँदैछ,’ ट्रम्पले ह्वाइट हाउसमा आयोजित संयुक्त पत्रकार सम्मेलनमा भने।

मोदीले आफ्नो देशमा भएको आतंकवादी हमलामा संलग्नलाई सुपुर्दुगी गर्ने निर्णयप्रति ट्रम्पलाई धन्यवाद दिए। मुम्बईको नरसंहार भएको घटनाको अभियुक्त भारतलाई दिने निर्णय भएकोमा राष्ट्रपतिप्रति आभारी छु। अभियुक्तबारे भारतको अदालतले उचित निर्णय गर्नेछ,’ मोदीले भने।

ट्रम्प र मोदी दुवैले आतंकवादविरूद्ध अमेरिका र भारत मिलेर अघि बढ्ने बताए। भारतको विदेश मन्त्रालयले यसअघि पनि तहवुर रानालाई सुपुर्दुगी गर्न अनुरोध गर्दै पत्राचार गरेको थियो। तहववुरले आफूलाई भारत सुपुर्दुगी नगर्न अदालतमा अपिल गरेका थिए। उनको अपिललाई जनावरी २१ मा अमेरिकी सर्वोच्च अदालतले खारेज गरिदिएको थियो।

त्यसपछि उनलाई भारत ल्याउने बाटो खुलेको हिन्दुस्तान टाइम्सले जनाएको छ। ट्रम्पले उक्त प्रक्रिया तत्कालै सुरू हुने भनेका छन्।