काठमाडौँ– मध्य, पूर्वी र पश्चिम अफ्रिकामा निरन्तर रूपमा देखिदै आएको ‘मंकीपक्स’ पहिलो पटक नेपालीलाई पनि पुष्टि भएको छ। साउदी अरेबियाबाट फर्किएका एक नेपालीमा मंकिपक्स पुष्टि भएको हो।

स्वास्थ्य मन्त्रालय स्रोतका अनुसार ती बिरामीको टेकु अस्पतालमा उपचार भइरहेको छ। अस्पताल स्रोतका अनुसार बिरामीको अवस्था सामान्य छ। उनीसँग सम्पर्कमा आएका अन्य व्यक्तिसँग ट्रेसिङ भइरहेको जनाईएको छ।

यसअघि गत १ असारमा एकजना विदेशी महिलालाई मंकीपक्स पुष्टि भएको थियो। नेपालीलाई मंकीपक्स देखिएको यो पहिलो घटना हो। चिकित्सकहरूका अनुसार एमपक्स रोग मंकीपक्स भाइरसबाट हुने एक किसिमको सरुवा रोग हो।

मानिसबाट मानिसमा वा जनावरबाट मानिसमा सर्ने यो रोग पोक्सभिरिडे परिवारको अर्थोपक्स भाइरस जिनस अन्तर्गत पर्ने डबल स्ट्रन्डेड डीएनए भाइरस हो। थुकको छिटा, खुल्ला छाला, मुख, आँखामा भाइरस परे सर्न र संक्रमण गर्छ। संक्रमितसँग नजिकमा रहने व्यक्तिमा ‘मंकीपक्स’ सर्ने जोखिम हुन्छ।

मंकीपक्सका लक्षण बिफरसँग मिल्दाजुल्दा हुन्छन्। तर, बिफरको तुलनामा मंकिपक्स कम गम्भीर र विरलै घातक हुने चिकित्सकहरु बताउँछन्। मंकीपक्सले २०२२–२०२३ मा विश्वव्यापी प्रकोपको रूप लिएको थियो। विभिन्न साना स्तनपायी जनावर (लोखर्के, बाँदरलगायत) बाट भाइरस सर्ने गर्छ।