काठमाडौँ– लामो समयदेखि अमेरिकामा बसेर घातक रोग क्यान्सरसँग जुधिरहेका बर्दियाको बढैयाताल गाउँपालिका– ५ राजपुरका विवेक पंगेनी अन्ततः हारेका छन्। उपचारका क्रममा हिजो उनको अस्पतालमै निधन भएको छ।

विवेक चौथो स्टेजको ब्रेन क्यान्सरसँग लडिरहेका थिए। उनीमात्रै होईन, श्रीमती सिर्जना सुबेदीले उनलाई बचाउन आफनो जिवनको उर्जावान समय उत्सर्ग गरेकी थिईन। श्रीमानप्रति सिर्जनाको त्याग र समर्पणका कारण अधिकांशले उनीहरुको जोडीको उदाहरण प्रश्तुत गर्थे।

पछिल्लो केही दिनदेखि विवेकको स्वास्थ्य अवस्था बिग्रिएको थियो। श्रीमानको अवस्था नाजुक भएपछि सिर्जनाले ससुरालाई नेपालबाट बोलाएकी थिइन्। सिर्जनाका पिता शिव सुवेदीका अनुसार विवेकका पिता मिनराज पंगेनी अमेरिका प्रस्थान गरिसकेका छन्।

विवेक २०७९ सालमा भौतिकशास्त्रमा पीएचडी गर्न फुल स्कलरसीपमा अमेरिका गएका थिए। अमेरिका पुगेको ५ महिनापछि नै पार्किन्सन्स रोगका कारण आमाको निधन भएको थियो। आमाको काजकिरियाका लागि विवेक पनि नेपाल आएका थिए।

काजक्रिया सकेर अमेरिका फर्केको एक सातामै विवेक बिरामी परे। अस्पतालमा परीक्षण गराउँदा ब्रेन क्यान्सर देखियो। त्यसयता सृजनाले एकछिन पनि श्रीमानको साथ छोडिनन्। सामाजिक सञ्जालबाटै सहायता आह्वान गरेर श्रीमानको उपचार गराइरहेकी थिईन। कठिन परिस्थितिमा पनि उनको अनुहारमा मुस्कान हराएको थिएन।

दुईवटा शल्यक्रिया गरेर ७० प्रतिशत ट्युमर निकालेपछि विवेकको बाँकी उपचार किमोथेरापी र रेडियसनमार्फत चलिरहेको थियो। सिर्जनाले सामाजिक सञ्जालमा सार्वजनिक गर्ने भीडीओका कारण भावुक भएर धेरैले आर्थिक सहयोग पनि गरेका थिए। विवेकको उपचारका लागि हालसम्म करिव १ लाख २ हजार डलरभन्दा बढी रकम संकलन भएको जनाईएको छ।

४ महिनाअघि भाईको मृत्यु
विवेक अमेरिकामा मृत्युसँग संघर्ष गरिरहँदा ४ महिनाअघि नेपालमा उनका भाइ विपिन पंगेनीको दुर्घटनामा परेर मृत्यु भएको थियो। आफु काम गर्ने नेपालगञ्जस्थित गाडी कम्पनीको शो रूममा गएर फर्कदै गर्दा विपीन २१ भदौको साँझ (तिजको दिन) करिव ८ बजे दुर्घटनामा परेका थिए।

खजुराबजार नजिकै दुर्घटनामा परेका विपिनलाई अस्पताल लैजाने क्रममा बाटोमै मृत्यु भएको थियो। मोटरसाइकल सडक किनाराबाट चिप्लिएर लडेको थियो। शरीरमा कतै पनि गम्भीर चोट र ठूलो रक्तश्राव नदेखिए पनि मुखबाट रगत बगेको थियो। उनका श्रीमती र १ वर्षमाथिका १ छोरा छन्।