काठमाडौँ– नेपाल प्रिमियर लिग (एनपिएल)मा विराटनगर किंग्सले चितवन राइनोजलाई ५१ रनले हराएको छ।

त्रिवि मैदान कीर्तिपुरमा शुक्रबार भएको खेलमा टस जितेर ब्याटिङ गरेको विराटनगरले ५ विकेट गुमाएर १८१ रन बनाएको थियो। विराटनगरका लागि बसिर अहमदले ४४ बलमा ४ छक्का र ४ चौकासहित सर्वाधिक ६८ रन बनाएर नट आउट रहे।

जवाफी ब्याटिङ गरेको चितवन राइनोजले निर्धारित २० ओभरमा ६ विकेट गुमाई जम्मा १३० रन मात्रै बनाएको थियो। चितवनका लागि अमर रौतेलाले सर्वाधिक ४२ रन बनाए। यसैगरी, सन्तोष कार्कीले २८, कप्तान कुशल मल्लले २५ र रवि बोपाराले २० रन जोडे।

यता विराटनगरका लागि कप्तान सन्दिप लामिछानेले दुई, बसिर अहमद, सुवास भण्डारी, क्रिस सोल र लोकेश बमले एक–एक विकेट लिए।