काठमाडौ– डिसेम्बर ४ मा हैदराबादको एक हलमा तेलुगु फिल्म ‘पुष्पा २’ को प्रदर्शनको क्रममा चलेको भागदौडको क्रममा एक महिलाको मृत्यु भएपछि त्यो घटनासँग सम्बन्धित रहेको आरोपमा प्रहरीले फिल्मका अभिनेता अल्लु अर्जुनलाई पक्राउ गरेको छ।

भागदौडमा ३९ वर्षीया एक महिलाको मृत्यु भएको थियो। उनका छोरा गम्भीर घाइते छन्। त्यो घट्नामा सम्वन्धित रहेर प्रहरीले सन्ध्या थिएटरको व्यवस्थापन, कलाकार र उनको सुरक्षा टोलीविरुद्ध मुद्दा दायर गरेको थियो। उक्त हलमा प्रिमियर समारोह हुँदैछ भनेर पूर्वसूचना समेत नदिइएका कारण घट्ना भएको जनाईएको छ।

इण्डियन एक्सप्रेसले लेखेको समाचार अनुसार अल्लुलाई चिक्कडपल्ली प्रहरी थानाको टोलीले शुक्रबार पक्राउ गरेको हो। सोही चौकीमा मुद्दा दर्ता गरिएको थियो। एफआईआर दर्ता गर्दा हैदराबाद प्रहरीको केन्द्रीय क्षेत्रका प्रहरी उपायुक्त अक्षांश यादवले द इन्डियन एक्सप्रेसलाई भनेका छन्, ‘बीएनएस धारा १०५ (हत्या नभएको अपराधी हत्याको सजाय) र ११८ अन्तर्गत मुद्दा दायर गरिएको छ।

प्रहरीले घटनाबारे अनुसन्धान भइरहेको र दोषी पाइए कानुनअनुसार कारवाही गरिने जनाएको छ।