गढीमाई दर्शन गरेर फर्किदै गरेको स्कारपियो रौतहटमा दुर्घटना हुँदा ८ जनाको मृत्यु
शीर्ष खबर 
जनकपुर— पूर्वपश्चिम राजमार्ग अन्तर्गत रौतहटको चन्द्रपुर नगरपालिका–४ स्थित धन्सार–लमाहा खण्डमा मंगलबार बिहानै स्कर्पियो दुर्घटना हुँदा चालकसहित ८ जनाको मृत्यु भएको छ भने ४ जना घाइते भएका छन्।
बाराको गढीमाई दर्शन गरेर सिराहा फर्कँदै गरेका दर्शनार्थी चढेको बा १६ च ३१६२ नम्बरको स्कर्पियो अनियन्त्रित भई धन्सारपुल नजिक जंगलमा रोडबाट तल दाहिने साइडको रुखमा ठोक्किएर दुर्घटना भएको हो।
इलाका प्रहरी कार्यालय चन्द्रनिगाहपुरका डीएसपी राजकुमार राईका अनुसार मृतक मध्ये अधिकांशको सनाखत हुन बाँकी छ। प्रहरीका अनुसार सिराहा अर्नमा गाउँपालिका–३ का ६० वर्षीया फुलमन्ति रामको उपचारको क्रममा मृत्यु भएको छ। त्यस्तै पहिचान नखुलेका ४५ वर्षीय स्कार्पिओ चालकको पनि उपचारको क्रममा मृत्यु भएको हो।
प्रहरीले घाइतेहरूको उद्धार गरी अस्पताल पठाएको छ। दुर्घटनामा घाइते भएका दुई बालबालिकासहितको चन्द्रनिगाहपुरस्थित ट्रमा सेन्टरमा उपचार भइरहेको छ। एक जनालाई थप उपचारको लागि वीरगन्ज रेफर गरिएको डीएसपी राईले जानकारी दिए।
प्रहरीका अनुसार घाइतेहरू बोल्न सक्ने अवस्थामा छन्।
