काठमाडौँ– प्रेमीकाको फोटो/भीडीओ सामाजिक सञ्जालका म्यासेन्जरमा साथीहरुलाई पठाएर चरित्र हत्या गरेको आरोपमा सप्तरीका एक युवक पक्राउ परेका छन्।

सप्तरीको बोदेबरसाइन नगरपालिका–६ फुल्काहीका २४ वर्षीय लक्ष्मण यादव (जगदिशप्रसाद यादव) लाई प्रहरीले आज त्रिभुवन अन्तर्राष्ट्रिय विमानस्थलबाट पक्राउ गरेको हो। प्रहरीका अनुसार उनीमाथि सामाजिक सञ्जाल मार्फत किशोरी (प्रेमीका) को चरित्र हत्या गरेको आरोप छ।

वैदेशिक रोजागरीका लागि कतारमा रहेका उनी काठमाडौँमा उत्रनासाथ विमानस्थल सुरक्षा कार्यालय गौचरको नियन्त्रणमा परेका हुन। उनलाई म्याद थपका लागि जिल्ला अदालत काठमाडौंमा पेश गरिने नेपाल प्रहरीको साइबर ब्यूरोका उपनिर्देशक एसपी भाग्येन्द्र पुरुष ढकालले जानकारी दिए।

प्रहरीका अनुसार कतारमै रहेका वेला लक्ष्मण र किशोरी फेसवुक मार्फत प्रेम सम्वन्धमा जोडिएका थिए। निकट सम्बन्धमा रहँदा खिचिएका तस्विर तथा रेकर्ड गरिएका भीडीओहरु आफन्त तथा साथीहरूका म्यासेन्जरमा पठाई चरित्र हत्या गरी दुःख दिएको भन्दै किशोरीले उनीविरुद्ध उजुरी दिएकी थिईन।

सोही उजुरीका आधारमा यादव पक्राउ गरिएको प्रहरीले जनाएको छ।