भाईरल झाँक्रीको गाडी मोटरसाईकल र स्कुटरलाई ठोकेर घरभित्र छिर्योः २ जना घाईते, झाँक्री फरार
शीर्ष खबर 
काठमाडौँ– सामाजिक सञ्जालमा आफूलाई ‘बिरामीको साथी धर्म गुरु’ भनेर भाईरल भएका झाँक्री प्रकाश भुजेल गाडी दुर्घटना गरेर फरार भएका छन्। उनी सवार बा १९ च ३६९५ नम्बरको गाडी काठमाडौँको शंखरापुर नगरपालिका–९, इन्द्रायणीमा दुर्घटना भएको छ।
काठमाडौँकै साँखुमा ‘प्रकाश मानव सेवा सांस्कृतिक झाँक्री केन्द्र’ सञ्चालन गरेका भुजेलको गाडीले एउटा मोटरसाइकल र स्कुटरलाई ठक्कर दिएको थियो। गाडीको ठक्करबाट मोटरसाईकल चालक र पछाडि बसेकी सानुमाया नगरकोटी घाइते भएका छन्। नगरकोटीको अवस्था गम्भीर रहेकाले उपचारका लागि ग्रान्डी अस्पताल धापासी लगिएको छ।
मोटरसाईकललाई ठक्कर दिएर भुजेलको गाडी सडकबाट घरको सटरमा पुगेर ठोक्किएको छ। त्यसलगत्तै भुजेल गाडी छोडेर फरार भएको प्रत्यक्षदर्शीले बताएका छन्। गाडी उनी आफैँले चलाएका थिए।
घटनाबारे अनुसन्धान भइरहेको र घाइतेलाई उपचारका लागि अस्पताल पठाइएको प्रहरीले जनाएको छ। फरार भएका भुजेललाई प्रहरीले खोजीरहेको छ।
