विराटनगर— पाँचथरबाट गोलिया काठ बोकेर झापा जाँदै गरेको ट्रक मेची राजमार्गको पाँचथरको भारपामा दुर्घटना हुँदा एकजनाको मृत्यु भएको छ।

ना ४ ख ७१२३ नम्बरको ट्रक फिदिम ताप्लेजुङ सडक खण्डअन्तर्गत हिलिहाङ–६ ढकालगाउँ नजिक दुर्घटना भएको हो। दुर्घटनामा हिलिहाङ–३, साम्रेका भवानीशंकर पौडेल (५७) को घटनास्थलमै मृत्यु भएको हो।

दुर्घटनामा परी ट्रकमा सवार इलाम सुर्योदय नगरपालिका–१२ का तेजबहादुर दास (५२) र झापा चारपानेका राजकुमार बस्नेत (४०) घाइते भएका छन्। गम्भिर अवस्थामा रहेका उनीहरुलाई पाँचथर अस्पतालबाट झापाको विर्तामोडस्थित बीएन्डसी अस्पताल रेफर गरिएको छ।

जिल्ला प्रहरी कार्यालय पाँचथरले दिएको जानकारी अनुसार ट्रक हिलिहाङ–१ सिंहापुरदेखि झापाका लागि हिडेको थियो। ट्रक कसरी दुर्घटना भयो भन्ने खुलेको छैन।