काठमाडौँ– प्रधानमन्त्री केपी शर्मा ओली ज्वरो आएर बिरामी परेका छन्। प्रधानमन्त्रीका प्रेस संयोजक प्रकाश सिलवालले स्वास्थ्यमा प्रतिकूलता देखिएको जानकारी दिए। ‘ज्वरो आएको छ। रगत परीक्षणका लागि पठाइएको छ’–उनले भने। प्रधानमन्त्री ओली बालुवाटारस्थित सरकारी निवासमै आराम गरिरहेको उनले बताएका छन्।

अस्वस्थताका कारण उनले आज अत्यावश्यक बाहेक अन्य भेटघाटका कार्यक्रम नराखेको उनको सचिवालयले जनाएको छ।

प्रधानमन्त्री ओलीले भने फेसवुक मार्फत ‘पूर्णबहादुरको सारङ्गी’ चलचित्र हेर्न समय मिलाउन नसकेको जानकारी गराएका छन्। ‘पूर्णबहादुरको सारङ्गी चलचित्र हेर्न निम्तो आएको छ। तर समय अभावले हेर्न पाएको छैन। फिल्मको समीक्षा हेर्दैगर्दा यसले हाम्रो सामाजिक परम्परा र व्यवसायिकताको अन्तरद्वन्द्वलाई राम्रोसँग उठान गरेको बुझेको छु। अनुकूलता मिले फिल्म हेर्ने छु। फिल्मका निर्माता र कलाकारहरुलाई बधाई !’– उनले फेसवुकमा लेखेका छन्।

यस वाहेक उनले आफ्नो स्वास्थ्यका बारेमा कुनै कुरा खुलाएका छैनन्।