जनकपुर– महोत्तरीको बर्दिबास जलेश्वर सडक खण्डमा पर्ने रामगोपालपुरमा दुईवटा मोटरसाइकल ठोक्किँदा एक जनाको मृत्यु भएको छ।

रामगोपालपुर नगरपालिका–५ मा औरहीबाट रामगोपालपुरतर्फ आउँदै गरेको प्र.२–०२–००४ प ८२४६ नम्बरको मोटरसाइकल र लु.प्र ०१००१ प २७३१ नम्बरको मोटरसाइकल आपसमा ठोक्किएका हुन्।

सोमबार साँझ साँझ भएको यो दुर्घटनामा प्र.२–०२–००४ प ८२४६ नम्बरको मोटरसाइकल चालक महोत्तरीको बलवा नगरपालिका–७ बनौटाका ३५ वर्षीय राजिव झाको मृत्यु भएको हो।

जिल्ला प्रहरी कार्यालय महोत्तरीका अनुसार दुर्घटनामा गम्भीर घाइते भएका उनको प्रादेशिक अस्पताल जलेश्वरमा उपचारको क्रममा मृत्यु भएको हो। दुर्घटनामा घाइते भएका सोही मोटरसाइकलमा सवार १ जनाको जनसेवा अस्पताल बर्दिबासमा उपचार भइरहेको छ।

दुर्घटनापछि लु.प्र ०१–००१ प २७३१ मोटरसाइकल चालक भने फरार भएका छन्।