काठमाडौँ — काठमाडौँ र धादिङको सिमानामा पर्ने धादिङको धुनिबेसी नगरपालिका–९ झ्याप्लेखोलाको पहिरोमा परेका ३ वटा गाडीका ३० जनाको मृत्यु भएको पुष्टि भएको छ। सुरक्षा निकायका अनुसार पहिरोमा एउटा बस र दुइटा माइक्रोबस पुरिएको अवस्थामा फेला परेका छन्।

चितवनबाट काठमाडौँ आउँदै गरेको बा ३ ज १३४५ नम्बरको माइक्रोबस आइतबार बिहान पुरिएको अवस्थामा भेटिएको छ। उक्त माइक्रो बसबाट १३ जनाको शव निकालिएको छ। मृत्यु हुने ४ महिला र ९ पुरुष छन्।

त्यही पहिरोमा बुटवलबाट काठमाडौं आउँदै गरेको लु १ ज ४५७८ नम्बरको माइक्रोबस पुरिँदा १४ जनाको मृत्यु भएको छ। माइक्रोबसबाट ८ पुरुष, ५ महिला र १ बच्चाको शव निकालिएको छ। गोरखाबाट काठमाडौं आउँदै गरेको ना ४ ख २२७० नम्बरको यात्रुवाहक बस पनि पुरिएको अवस्थामा फेला परेको छ।

उक्त बसबाट ३ जना पुरुषको शव निकालिएको छ। यो बस शुक्रबार राती १० बजेदेखि सम्पर्कविहिन थियो।