सुनकोशी नदीमा हाइलक्स खस्योः एक जना घाईते, ३ जना वेपत्ता
शीर्ष खबर
८ भदौ २०८१ १४:३८
काठमाण्डौं– खोटाङको हलेसीबाट काठमाण्डौं आउँदै गरेको इसुजु हाइलक्स गाडी शनिवार साँझ सुनकोशी नदीमा खस्दा ३ जना वेपत्ता भएका छन्।
मध्य पहाडी लोकमार्ग अन्तर्गत सिन्धुलीको गोलान्जोर गाउँपालिका– १, कुडेलेबाट शनिबार साँझ पौने ६ बजे गाडी नदीमा खसेको हो। गाडीको नम्बर खुलेको छैन।
दुर्घटना भएको खबर पाउनासाथ सशस्त्र प्रहरी बल नेपाल विपद व्यवस्थापन बेश खुर्कोटबाट गोताखोरसहित १० जनाको टोली खटिएको छ।
प्रहरीका अनुसार गाडीमा ४ जना सवार थिए। ती मध्ये भक्तपुर सूर्यविनायक नगरपालिका जगातीका ३२ वर्षीय चालक अबिन बाके, सोही ठाउँका ३० वर्षीय प्रनित स्यागु र ३७ वर्षीय बलराम घटुवा बेपत्ता छन्।
सूर्य विनायक नगरपालिका जगातीका २७ वर्षीय सुशान्त कक्षपतीले भने रोडमा हामफालेर ज्यान जोगाएका छन्। उनी सामान्य घाइते भएकाले उपचारका लागि खुर्कोट अस्पताल पठाईएको प्रहरीले जनाएको छ।
प्रतिक्रिया
