राजविराज– सुनसरी र उदयपुर जोड्ने सप्तकोशी नदीको चतरा पुलबाट करिव ३५ वर्षका एक युवक नदीमा हामफालेर बेपत्ता भएका छन्।

सोमबार अपरान्ह करिव साढे चार बजे ती युवक सुनसरीतर्फबाट को ९ प ९८६५ नम्बरको स्कुटर लिएर पुलमा पुगेका थिए। पुलको करिव बीच भागमा स्कुटर रोकेर उनले नदीमा हामफालेको प्रत्यक्षदर्शीले जनाएका छन्।

नदीमा हामफाल्नुअघि उनले मोबाइल र घडी पुलको डिलमा राखेको पाईएको छ। उनको स्कुटर उदयपुरतर्फ फर्किएको थियो। उदयपुर र सुनसरीतर्फ पुलको दुवैतिर रहेको प्रहरीले युवकको खोजीका लागि प्रयास गरेपनि उनलाई कोशीले बगाएर लगेको प्रत्यक्षदर्शीहरूले बताए।

युवकको पहिचान नखुलेको स्थानीय प्रहरीले जनाएको छ। प्रहरीले कोशी पुलमा जडान गरेको सिसिटिभी फुटेजमा पनि युवक नदीमा हामफालेको देखिएको जनाइएको छ।