विराटनगर– विराटनगर महानगरपालिकाले गत आव (आर्थिक वर्ष २०८०–८१) मा पदाधिकारीको बैठक भत्ता र पदाधिकारीको सुविधामै झण्डै ३ करोड रुपैयाँ सकेको छ।

महानगरपालिकाले दिएको खर्च विवरण अनुसार तलव भत्ता र सुविधाका नाममा २ करोड ७० लाख भन्दा बढी रकम खर्च भएको छ। पदाधिकारीको बैठक भत्तामा ७० लाख ९३ हजार ८५० र पदाधिकारीको अन्य सुविधामा १ करोड ९९ लाख ६६ हजार रुपैयाँ सकिएको छ। विविध खर्चमा १ करोड ६४ लाख ९६ हजार १९३ रुपैयाँ उल्लेख छ।

विविध खर्च शीर्षकमा धेरै रकम राखेर खर्च गर्नु कानुन विपरीत भएको भन्दै यसअघिको महालेखा परीक्षकको प्रतिवेदनमा उल्लेख छ।

तर, त्यसको वेवास्ता गर्दै डेढ करोडभन्दा वढि रकम खर्च गरेको पाईएको छ। यो रकम अघिल्लो आवको भन्दा २५ लाख बढी हो।

महानगरको आय–व्यय विवरण अनुसार चालू खर्चतर्फ कर्मचारीको बैठक भत्तामा १९ लाख ८ हजार, अन्य भत्तामा २ करोड ७२ लाख ६९ हजार ९९०, पदाधिकारीको इन्धन खर्चमा ५८ लाख ९४ हजार ३२३, कार्यालय प्रयोजनको लागि इन्धन खर्च ८४ लाख ४६ हजार १५१ रुपैयाँ, मसलन्द तथा कार्यालय सामाग्री शीर्षकमा १ करोड ६९ लाख ७ हजार ७९४ रुपैयाँ, अन्य कार्यालय सञ्चालन खर्च ५ करोड १९ लाख ३३ हजार २६६ रुपैयाँ, सेवा र परामर्श खर्चमा ६५ लाख ६२ हजार ८५० रुपैयाँ खर्च गरिएको छ।

तालिम, गोष्ठी र कार्यक्रममा पनि असाध्यै धेरै खर्च छ। कर्मचारी तालिम खर्चमा १७ लाख ४६ हजार ९६१ रुपैयाँ, सीप विकास तथा जनचेतना तालिम तथा गोष्ठीमा १ करोड ७२ लाख ८० हजार १६ रुपैयाँ, कार्यक्रम खर्च शीर्षकमा १४ करोड २४ लाख १२ हजार ९९७ रुपैयाँ, विविध कार्यक्रम खर्चमा २ करोड १६ हजार ७२७ रुपैयाँ, अनुगमन, मूल्याङ्कन खर्चमा ५५ लाख ३६ हजार २९० रुपैयाँ, भ्रमण खर्चमा १४ लाख ९४ हजार ८८१ रुपैयाँ, विशिष्ट व्यक्ति तथा प्रतिनिधि मण्डलको भ्रमण खर्चमा ३ लाख ४८ हजार ४८६ रुपैयाँ र अन्य भ्रमण खर्चमा ९ लाख ४६ हजार ६ सय रुपैयाँ खर्च उल्लेख गरिएको छ।

स्थानीय सरकार सञ्चालन ऐन २०७४ को दफा ७१ बमोजिम व्ययको बजेट अनुमान आन्तरिक आयको परिधिभित्र रही औचित्यको आधारमा विविध खर्च गर्नुपर्ने उल्लेख छ।