चितवन– नारायणघाट–मुग्लिङ सडकखण्ड अन्तर्गत चितवनको भरतपुर महानगरपालिका–२९, भतेरीमा यात्रुबसले तेलको ट्याङ्कररलाई पछाडिबाट ठक्कर दिँदा १५ जना यात्रु घाइते भएका छन्। घाईते मध्ये १ जनाको अवस्था गम्भिर छ।

प्रहरीका अनुसार शनिबार अपराह्न ३ बजे नारायणघाटबाट पोखरा जाँदै गरेको ग २ ख १४०१ नम्बरको बसले सोही दिशामा जाँदै गरेको ना ७ ख ५४९१ नम्बरको पेट्रोल ट्याङ्करलाई पछाडिबाट ठक्कर दिएको थियो।

घटनामा १५ जना घाईते भएका छन्। उनीहरु मध्ये १० जनालाई नयाँ मेडिकल कलेजमा भर्ना गरिएको छ। तीमध्ये १ जनाको अवस्था गम्भीर रहेको छ भने ९ जना मध्यम रहेको जिल्ला प्रहरी कार्यालय चितवनले जनाएको छ।

यसैगरी, पुरानो मेडिकल कलेजमा १ जना र सरकारी अस्पतालमा ४ जनालाई भर्ना गरिएको छ। उनीहरुको अवस्था मध्यम रहेको प्रहरीको भनाई छ। घाइतेहरुको परिचय खुलिसकेको छैन। दुवै सवारी साधनलाई प्रहरीले नियन्त्रणमा लिइएर दुर्घटनाको अनुसन्धान गरिरहेको छ।