सम्झनाको अविजित ७२ रनको मद्दतले नेपालको ऐतिहासिक जित, ६ विकेटले हार्यो यूएई
शीर्ष खबर 
काठमाण्डौं– एसीसी वुमन्स एसिया कपमा नेपालले यूएईमाथि ६ विकेटको ऐतिहासिक जित निकालेको छ। नेपालले महिला एसिया कप इतिहासमा पहिलो जित हात पारेको हो। यसअघि नेपाल एसिया कपमा २०१२ मा तीन र २०१६ मा ५ खेलमा नेपाल पराजित भएको थियो।
श्रीलंकाको डाम्बुलामा भएको खेलामा नेपालले १६ दशमलव १ ओभरमा ४ विकेट गुमाउँदै ११६ रनको लक्ष्य पूरा गर्यो। नेपालको जितमा सम्झना खड्का ४५ बलमा ११ चौकासहित ७२ रनमा नटआउट रहिन् भने पूजा महतो ७ रनमा नट आउट रहिन्। सीता रानामगर ७, कविता कुँवर २, इन्दु बर्मा ६ र रुविना क्षेत्री १० रनमा आउट भए।
यूएईकी कविसा कुमारीले ४ ओभरमा १ मेडनसहित १२ रन खर्चेर ३ विकेट लिइन्।
त्यसअघि यूएईले २० ओभरमा ८ विकेट गुमाउँदै ११५ रन बनाएको थियो। यूएईकीका लागि खुसी शर्माले ३९ बलमा २ चौकासहित सर्वाधिक ३६ रन बनाइन् भने कप्तान ईशा ओझा १०, रिनिथा रजिथा ६ थीर्थ सतिश ९ रनमा र समिरा धर्निधर्क १३ रनमा आउट भए।
एक समय यूएई ७.२ ओभरमा ४६–४ को अवस्थामा पुगेको यूएईलाई पाँचौं विकेटका लागि खुसी शर्मा र काविशा कुमारीले ४१ बलमा ३२ रनको महत्वपूर्ण साझेदारी गरेका थिए। काविशा २६ बलमा २ चौकासहित २२ रनमा आउट भइन्।
नेपालकी कप्तान इन्दु बर्माले ४ ओभरमा १९ रन खर्चेर ३ विकेट लिइन् भने स्पिनर कृतिका मरासिनीले २ ओभरमा १५ रन खर्चेर १, सबनम राइले ३ ओभरमा २७ रन खर्चेर १ र कविता जोशीले १ विकेट लिए।
नेपालले दोस्रो खेल ६ साउनमा पाकिस्तान र ८ साउनमा भारतसँग खेल्नेछ।
