चितवन– गत २८ असारमा चितवनको सिमलतालबाट पहिरोसहित त्रिशूलीमा खसेका दुईवटा बसमा रहेका मध्ये हालसम्म १९ जनाको शव फेला परेको छ। १४ जनाको सनाखत भएर परिवारले शव बुझिकेका छन्। तर, बाँकी ५ जनाको भने सनाखत हुन बाँकी छ।

सनाखत हुन बाँकी रहेका शवहरु भरतपुर अस्पतालको शव गृहमा राखिएका छन्। बुधबार ५ जनाको शव सनाखत भएको हो। ३१ असरमा पूर्वी नवलपरासीको विनयत्रिवेणीमा भेटिएको शव रामनगरका जितेन्द्र देवको बुधबार सनाखत भएको छ। रौतहटको गरुडा–९ का ९ बर्षीय बालक अशोककुमार यादव, पर्साको सखुवा प्रसौनी–२ का २८ बर्षिया चन्द्रप्रभा कुमारी चौधरीको पनि शव सनाखत भएको छ।

मंगलबार मात्रै गैंडाकोट ७ मा शव भेटिएका शितामणि थाना भारतका २७ वर्षीय विवेक यादव र मध्यविन्दु १२ पूर्वी नवलपरासीमा शव भेटिएकी वौधिमाई ७ रौतहटकी २९ वर्षीया अमृताकुमारी सनाखत भएको छ। उनीहरु चारै जना काठमाडौंबाट गौर जाँदै गरेको गणपति डिलक्सका यात्रु हुन्।

बुधबार मात्रै भरतपुर महानगरपालिका–२७, सालबासमा एक र पूर्वी नवलपरासीको विनय त्रिवेणी गाउँपालिका–७ मा रहेको नेपाल भारत सिमानास्थित ब्यारेजपुलमा थप १ जनाको शव फेला परेको छ।

२८ असारको बिहान साढे ३ बजे लेदोसहितको पहिरोले काठमाडौंबाट रौतहटको गौर जाँदै गरेको बागमती प्रदेश–०३–००१ ख २४९५ नम्बरको गणपति डिलक्स र वीरगञ्जबाट काठमाडौं जाँदै गरेको बागमती प्रदेश–०३–००६ ख १५१६ नम्बरको एन्जल डिलक्सलाई पहिरोले त्रिशुलीमा धकेलेको थियो।

टिकट काउन्टर र आफन्तले दिएको विवरण अनुसार एञ्जल डिलक्समा ३८ र गणपति डिलक्समा २७ गरी कुल ६५ जना यात्रु र स्टाफ थिए। गणपति डिलक्सबाट हामफालेर रौतहटको गरुडा नगरपालिका–९ का जुगेश्वर राय यादव, सरोजकुमार गुप्ता र रौतहटकै देवाही बनाही नगरपालिका–१० का नन्दन दासले ज्यान वचाएका थिए।

वेपत्ता बस र ४३ जना यात्रुको शव अझै फेला परेको छैन।