भ्रष्टाचार मुद्दामा मुछिएका मलावीका उपराष्ट्रपतिसहित ९ जना सवार जहाज बेपत्ता
![भ्रष्टाचार मुद्दामा मुछिएका मलावीका उपराष्ट्रपतिसहित ९ जना सवार जहाज बेपत्ता](https://www.sheershakhabar.com/wp-content/uploads/2024/06/malabi.jpg)
काठमाण्डौं– अफ्रिकी मुलुक मलावीका उपराष्ट्रपति सौलोस क्लोस चिलि सवार एक हवाईजहाज बेपत्ता भएको छ। जहाजमा उनीसहित ९ जना सवार थिए।
राजधानी लिलोंग्वेबाट जुजु अन्तर्राष्ट्रिय विमानस्थलतर्फ जाँदै गर्दा हवाईजहाज बेपत्ता भएको हो। मलावीको राष्ट्रपति कार्यालयले वक्तव्य जारी गर्दै उपराष्ट्रपति सौलोस क्लोस चिलिमा सहित ९ जना सवार हवाईजहाज बेपत्ता भएको जानकारी दिएको छ।
५१ वर्षीय चिलिमा मलावी सेनाको हवाईजहाजमा थिए। उक्त हवाईजहाज स्थानीय समयअनुसार ९ः१७ बजे (नेपाली समय अनुसार दिउँसो १ बजे) राडारसँग सम्पर्कविच्छेद भएको थियो। उनीहरुको खोजीकार्य जारी रहेको जनाएको छ।
राष्ट्रपति लाजरस चकवेराले सुरक्षाकर्मीहरुलाई खोज तथा उद्धारमा परिचालित हुन निर्देशन दिएका छन् । उनले बहामास जाने पूर्वनिर्धारित कार्यक्रम पनि रद्द गरेका छन् ।
सन् २०२२ मा उपराष्ट्रपति चिलिमालाई भ्रष्टाचार आरोपमा पक्राउ गरिएको थियो। उनीमाथि ब्रिटिश–मलावी व्यापारीसँग सम्बन्धित भ्रष्टाचार मुद्दामा मुछिएको आरोप छ। उनले भने आफूमाथि लगाइएका आरोपहरु खण्डन गर्दै आएका छन्।