श्रीमतीलाई भावुक पत्र लेखेर चर्चित रक्तादाता मैनालीले गरे आत्महत्या, सालोप्रति गुनासो
शीर्ष खबर 
काठमाडौं– लामो समयदेखि अमेरिकामा बस्दै आएका चर्चित रक्तदाता अर्जुन मैनालीले सालो र उनकी श्रीमतीलाई अखानो देखाएर आत्महत्या गरेका छन्। सामाजिक सञ्जाल फेसबुकमा श्रीमती तारालाई भावुक स्ट्याटस लेखेर उनले आत्महत्या गरेका हुन।
घरबाट बेपत्ता भएका मैनालीको शव अमेरिकाको नर्थ क्यारोलिनास्थित लट्टा नेचर प्रिजर्भस्थित पार्कमा फेला परेको छ। बन्द अवस्थामा रहेको भाडाको कारभित्र जलेको अवस्थामा उनको शव भेटिएको त्यहाँस्थित एकजना प्रवासी नेपाली पुरुषोत्तम ढकालले जानकारी दिएका छन्।
‘दुखेको मन र मन जोड्ने र हारेको मान्छेलाई जिन्दगी जिउन र जित्न अभिप्रेरित गर्ने रक्तदाता अर्जुनप्रसाद मैनाली भाडामा लिएको गाडी बन्द गरेर जलेर मरेको अवस्थामा नर्थ क्यारोलिनाको क्वेष्ट पार्कमा मृत फेला परेको खबरले स्तब्ध छु’, ढकालले सोमबार सामाजिक सञ्जालमा लेखेका छन्।
घरमा पारिवारिक तनाव भएपछि उनी सोमबार भाडाको कार लिएर उक्त पार्कमा पुगेका थिए। कार पनि जलेको छ। प्रहरीले कार बन्द गरेर मैनालीले आफ्नो शरीरमा आगो लगाएको प्रारम्भिक अनुमान गरेको छ।
मैनालीको शव नर्थ क्यारोलिनास्थित प्रहरीको टोलीले पोस्टमार्टमका लागि लगेको छ। मैनालीको निधन भएको पुष्टिसहितको पत्र प्रहरीले परिवारलाई बुझाइसकेको छ। आफूलाई समाजसेवीका रुपमा विश्वभर चिनाएका मैनालीले जीवन समाप्त पार्न रोजेको यो कदमबाट नेपालसहित प्रवासमा रहेका नेपाली समुदाय स्तब्ध भएको ढकालले बताए।
मैनाली बेपत्ता भएपछि उनको अमेरिकास्थित घरमा आफन्तको रूवाबासी चलेको थियो। मैनाली रक्तदाताका रूपमा विश्वभर चर्चित थिए। उनले नेपालदेखि कयौं अफ्रिकी मुलुकमा समेत पुगेर रगतदान गरेका थिए।
नेपाल, भारत, क्यानडा, बेलायत, घाना, मकाउ, बर्मुडा, आयरल्याण्ड, अष्ट्रेलिया, इक्वेडर, हाइटी, युगाण्डा, थाइल्यान्ड, इथिओपिया, मलावी, रुवान्डा, केन्या, अर्जेन्टिना र मेक्सिको पुगेर उनले आफ्नो जीवनकालमा २०६ पटकमा १०२ लिटर रक्तदान गरेका छन्।
पारिवारिक तनावका कारण आत्मदाह गर्न पुगेका मैनालीले आफनो फेसवुक स्ट्याटसमा साला र उनकी पत्निप्रति गुनासो गरेका छन्। मैनालीको सालको परिवार पनि नर्थ क्यारोलिनामै बस्छन्। काभ्रे घर भएका मैनाली सन् २००० मा अमेरिकन एशोसिएसन अफ ब्लड बैंकको वार्षिक सम्मेलनमा भाग लिन अमेरिका पुगेका थिए। त्यसपछि उनी अमेरिकमै बस्दै आएका थिए। पहिले उनी न्यूयोर्कमा बस्थे। त्यसपछि नर्थ क्यारोलिनामा सरेका थिए।
उनलाई अमेरिकन रेडक्रसले सन् २००९ मा ‘द गुड नेइबर’ सम्मान दिएको थियो। उनले अमेरिकामा विभिन्न तीन सामाजिक संस्था स्थापना गरेर रक्तदान अभियानलाई अघि बढाइरहेका थिए। पछिल्लो समयसम्म उनी यी संस्थामा निरन्तर क्रियाशील थिए। उनका श्रीमती, एक छोरा र एक छोरी छन्। छोरीको विवाह भईसकेको छ भने छोरा सानै छन्।
पुरा स्ट्याटस पढ्न तलको फोटोमा क्लिक गर्नुहोस।
