सिन्धुली– कथित तपस्वी रामबहादुर बम्जनविरुद्ध बाल यौन शोषणको मुद्दा हालेकी किशोरीका बुवाको सवारी दुर्घटनामा मृत्यु भएको छ। परिवारका सदस्यले भने षडन्त्र गरेर उनको हत्या गरेको आशंका गर्दै अनुशन्धानको माग गरेका छन्।

जिल्ला प्रहरी कार्यालय सिन्धुलीका अनुसार मंगलबार रौतहटबाट सिन्धुलीको डगाहतर्फ जाँदै गरेका उनको दुर्घटनामा परेर मृत्यु भएको हो। किशोरीका बुवा सवार बा ५८ प ९१४१ नम्बरको मोटरसाइकललाई भिमानतर्फ जाँदै गरेको प्र २–०४–००१ ट ००१० नम्बरको ट्याक्टरले ठक्कर दिएको थियो।

भिमानमा भएको दुर्घटनामा घाईते भएका उनलाई उपचारका लागि सिन्धुली जिल्ला अस्पतालमा भर्ना गरिएको थियो। उपचारकै क्रममा उनको मृत्यु भएको सिन्धुलीका एसपी राजकुमार सिलवालले बताए।

उक्त ट्याक्टरले ती किशोरीका बुवा सवार मोटरसाइकलसँगै ना ११ प ५७५० नम्बरको मोटरसाइकललाई पनि ठक्कर दिएको थियो। यसका चालक पुष्पलाल अधिकारी भने उपचारपछि अस्पतालबाट डिस्चार्ज भइसकेका छन्। उनलाई प्रहरीले नियन्त्रणमा लिएको छ।

आफन्तले उनलाई षड्यन्त्र गरेर मारिएको हुन सक्ने आशंका गरेका छन्। किशोरीले बम्जन विरुद्ध सर्लाही जिल्ला अदालतमा मुद्दा दायर गरेकी थिईन। ती किशोरीका बुवाले केही दिनअघि मात्रै बम्जनले गरेको यौन शोषणबारे अन्तर्वार्ता पनि दिएका थिए।

बाराको रतनपुरीस्थित जंगलको आश्रममा बस्दा ती किशोरीलाई बाल यौन शोषण गरेको अभियोगमा बम्जन हाल महोत्तरी जिल्ला कारागारमा छन्।