रुपन्देही– रुपन्देहीको मर्चवारी गाउँपालिकामा ८ वर्षीया बालिकाको हत्या आरोपमा १ जना पक्राउ परेका छन्। मर्चवारी गाउँपालिका–१ पचुवालीकी बालिकाको हत्या आरोपमा मर्चवारी गाउँपालिका–१ महाराजगञ्जका ३२ वर्षीय अकबर अली पक्राउ परेका हुन्।

शुक्रबार साँझदेखि हराएकी ती बालिका शनिवार विहान घरदेखि सवा २ किलोमिटर दक्षिणतर्फ मृतअवस्थामा भेटिएकी हुन्। अपहरण र मृत्युुको अन्य कारण नदेखिएकाले बलात्कारको आशंका गरिएको छ।

घरबाहिर खेलिरहेकी बालिका साँझ अवेरसम्म घर नफर्किएपछि परिवारले राती १० बजेपछि प्रहरीलाई खबर गरेको थियो। इलाका प्रहरी कार्यालय मर्चवारको टोलीले खोजी गर्दै जाँदा वडा नं. १ स्थित खोल्साको पानीमा घोप्टो परेको अवस्थामा बालिकाको शव फेला पारेको थियो।

बालिका हराएको खबर पाएपछि खोजी गर्ने क्रममा एकजनाले साइकलमा राखेर लैजाँदै गरेको सूचना प्रहरीले पाएको थियो। सोधपुछ गर्दै जाँदा साईकलवाला ब्यक्ति अली भएको खुलेपछि उनलाई पक्राउ गरिएको हो।

पक्राउ परेका अलीले बालिकालाई साइकलमा लिएर खोलामा लगेर हत्या गरेको बताएपछि उनैको सहयोगमा शव फेला पारिएको जिल्ला प्रहरी कार्यालय रुपन्देहीका डीएसपी मनोहर भट्टले जानकारी दिए। बालिकाको शव पोष्टमार्टमका लागि भीम अस्पताल भैरहवामा राखिएको छ।

बालिकाको शव हिलोसहितको खोल्सामा घोप्टो परेको अवस्थामा फेला परेको र शवको प्रकृत्ति हेर्दा हिलोमा टाउको थिचेर हत्या गरिएको हुनसक्ने रुपन्देही प्रहरीका एसपी भरतबहादुर विकले वताए।