विरगञ्ज– वीरगञ्जस्थित बाल सुधारगृहमा उत्पात मच्चाउने १५ जना बाल कैदीवन्दीलाई भक्तपुर बाल सुधार गृहमा फिर्ता पठाउने सहमति भएको छ। उनीहरुलाई ३ साताअघि भक्तपुरबाटै विरगन्ज ल्याईएको थियो।

भक्तपुरबाट ल्याइएका १८ जना बालकैदी र यहाँ पहिलेदेखि बस्दै आएका कैदीहरूबिच मंगलवार रातभर झडप भएको थियो । झडपले उग्र रूप लिँदा स्थिति नियन्त्रण बाहिर गएको थियो ।

बालकैदीबिच भएको झडमा ११ जना कैदी र ३ जना प्रहरी घाइते भएका थिए । १८ जना कैदीमध्ये १५ जना फिर्ता पठाउने सहमति भएपछि मात्रै स्थिति नियन्त्रणमा आएको पर्साका सीडीओ हिरालाल रेग्मीले बताए।

भक्तपुरबाट आएका बालकैदीहरूले यहाँ नबस्ने भन्दै विरोध जनाउँदै आएका थिए । सोही विषयलाई लिएर उनीहरूले सुधार गृहका नाइकेसँग विवाद गरी कुटपिट गरेपछि स्थिति तनावग्रस्त बनेको हो ।

भक्तपुरको बाल सुधारगृहमा भदौ ४ मा जेल फुटाएर विरोध गर्दै निस्किएका मध्ये १८ जना बालकैदीहरूलाई वीरगञ्जको बाल सुधार गृहमा ल्याइएको थियो। त्यहाँ पहिलेदेखि १३१ जना बालकैदी रहँदै आएका छन् । सुधारगृहमा अहिले कुल १४९ जना बालकैदी छन् तर सुधार गृहको क्षमता भने ६० जनामात्रै रहेको प्रजिअ रेग्मीले जनाए ।

अदालतबाट फैसला हुदाँ बालिग रहेका सुधार गृहका कैदीहरु अहिले २५÷२६ वर्ष उमेर पुगिसकेको तर, अदालतबाट फैसला नआएसम्म सुधारगृहबाट कारागारमा राख्न नसकिने सीडीओ रेग्मीले जनाए ।