दमक– मादक पदार्थ सेवन गरी मोटरसाईकल हुँईक्याउँदा दुर्घटनामा परेर बिहिबार मध्येराती झापामा एक जनाको मृत्यु भएको छ। मोटरसाईकल अनियन्त्रित भई सडक किनारको विजुलीको पोलमा ठोक्किँदा नेपालमा पाहुना आएका भारतीय नागरिकको मृत्यु भएको हो।

पाडाजुँगी–गौरीगञ्ज सडकखण्ड अन्तर्गत गौरादह–१, सितापुरीमा १ बजे राती गौरादहतर्फ जाँदै गरेको लु ९ प १२७१ नम्बरको मोटरसाइकल आफैं अनियन्त्रित भइ बिजुलीको पोलमा ठोक्किएको थियो।

दुर्घटनामा मोटरसाइकलको पछाडि सवार भारतको झारखण्ड राज्य गोडा घर भई पाहुना आएका ४१ वर्षीय कमल ठाकुरको मृत्यु भएको छ। टाउकोमा गम्भिर चोट लागेका ठाकुरलाई उपचारका लागि दमकको निम्स अस्पताल भर्ना गरिएको थियो।

उपचारकै क्रममा बिहान साढे २ बजे उनको मृत्यु भएको प्रहरीले जनाएको छ। मोटरसाइकल चालक गौरादह १ का ३३ वर्षीय गोपाल ठाकुरलाई इलाका प्रहरी कार्यालय दमकले पक्राउ गरेको छ। चालकले मादक पदार्थ सेवन गर्दा दुर्घटना भएको प्रहरीले जनाएको छ।

फाईल फोटो।