तुलसीपुर– दाङको तुलसीपुर उपमहानगरपालिका–८, कटकुइयाको एउटा विवाह मण्डपबाट प्रहरीले वेहुला र पण्डितलाई पक्राउ गरेको छ। कटकुईयाका वेहुला २९ वर्षीय डाक्टर केसी र पण्डित ५७ वर्षीय ताराप्रसाद देवकोटा पक्राउ परेका हुन।

प्रहरीले उनीहरुलाई बालविवाह गरेको आरोपमा पक्राउ गरेको हो। डाक्टर केसीले बिहीबार तुलसीपुर–५, रानीजरुवाकी १४ बर्षीया बालिकालाई भगाएर घरमा लगी विवाह गरीरहेका थिए। त्यसैवेला ईलाका प्रहरी कार्यालय तुलसीपुरबाट खटिएको प्रहरी टोलीले उनीहरुलाई पक्राउ गरेको हो।

बालविवाह भइरहेको गोप्य सूचना प्राप्त भएपछि प्रहरी त्यहाँ पुगेको थियो। पक्राउ परेका दुबै जनालाई शुक्रबार जिल्ला अदालत दाङमा उपस्थित गराई ५ दिनको म्याद लिएर अनुसन्धान भईरहेको प्रहरीले जनाएको छ।