मलंगवा– क्रिकेट खेलको माध्यमबाट सर्लाहीसहित देशको मान अन्तर्राष्ट्रिय क्षेत्रमा विस्तार गरेको भन्दै नेपाल पत्रकार महासङ्घ सर्लाही शाखाले राष्ट्रिय टोलीका क्रिकेट खेलाडी गुलशन झालाई सम्मान गरेको छ।

मलङ्गवामा सोमवार एक कार्यक्रमको आयोजना गरी उनलाई सम्मान गरिएको हो। सर्लाहीको चक्रघट्टा गाउँपालिका–७, सगरदिना स्थायी घर भएका झा हाल सदरमुकाम मलङ्गवा–८ मा बस्दै आएका छन्।

नेपालले टी–२० विश्वकपको एसिया छनोटमा उत्कृष्ट प्रदर्शन गरेको थियो। राष्ट्रिय क्रिकेट टोलीका अलराउन्डर झाको हौसला बढाउनका लागि अभिनन्दन गरिएको नेपाल पत्रकार महासङ्घ सर्लाही शाखाका अध्यक्ष टङ्क क्षेत्रीले जानकारी दिए।

जिल्ला समन्वय समिति सर्लाहीका प्रमुख कौशलकिशोर सिंह, चन्द्रनगर गाउँपालिकाका अध्यक्ष राजकुमार महतो, प्रमुख जिल्ला अधिकारी कोमलप्रसाद धमला, नेपाल पत्रकार महासङ्घका अध्यक्ष क्षेत्रीले संयुक्त रूपमा झालाई दोसल्ला ओढाएर कदरपत्र प्रदान गरेका थिए।