काठमाडौँ– हिन्दु मन्दिरमा मलमुत्र छर्केको आरोपमा प्रहरीले एक क्रिस्चियन महिलालाई पक्राउ गरेको छ। काठमाडौँ क्षेत्रपाटी नजिकै धोबीचौर घर भई सुकेधारा बस्दै आएकी ६१ वर्षीया मिठु तिवारी गर्तौलालाई प्रहरीले पक्राउ गरेको हो।

मिठु ६ वर्षअघि हिन्दु धर्म परिवर्तन गरी क्रिस्चियन बनेको खुलेको छ। ५५ वर्षको उमेरमा धर्म परिवर्तन गरेकी उनले नागार्जुन नगरपालिका–५ स्थित आदेश्वर मन्दिरमा मलमुत्र छर्केको आरोप छ। बोतलमा पिसाब बोकेर गएकी उनी मन्दिर भित्रको मूर्ति र बाहिर पनि पिसाब छर्केर फरार भएकी थिइन्।

त्यसबारे स्थानीयले गत २६ पुसमा प्रहरीलाई लिखित जानकारी गराएका थिए। उनीहरुका अनुसार मिठुले त्यसपछि २१ फागुनमा पनि सोही मन्दिर नजिकैको चुण्डेश्वर, सीतापाइलास्थित गणेश मन्दिर, हरिसिद्धी मन्दिरमासमेत पिसाब छर्किएकी थिईन।

सीतापाइला नजिकैको मन्दिरमा त उनले पटक–पटक मलमूत्र छर्कने प्रयास गरेको जनाईएको छ। प्रहरीले उनलाई सीसीटीभी फुटेजका आधारमा पक्राउ गरेको हो। प्रहरीका अनुसार बिहीबार मध्यान्ह उनी पाँच वटा प्लाष्टिकको बोतलमा पिसाब बोकेर आदेश्वर मन्दिर पुगेकी थिईन्।

उनलाई सोही ठाउँमा पक्राउ गरिएको हो। उनीविरुद्ध ‘धर्मसम्बन्धी कसूर’ मा आवश्यक छानबिन र अनुसन्धान भईरहेको छ। जिल्ला अदालत काठमाडौंले उनलाई हिरासतमा राखेर अनुशन्धान गर्न पाँच दिनको म्याद दिएको छ।

प्रहरीले ती महिलाले यसअघि १४ मंसिर, १२ फागुन र २१ चैतमा हिन्दु मन्दिरहरुमा पिसाब छर्कंदै गरेको सिसिटिभी फुटेजसमेत संकलन गरेको छ।