जनकपुर– महोत्तरीको बलवा नगरपालिकामा एक बालिकामाथि सामुहिक बलात्कार भएको छ। पीडित बालिकाका बुवाले बताए अनुसार घट्ना विहिबार भएको हो।

राति कामबाट फर्कदा छोरी घरमा नदेखेपछि खोज्दै जाँदा दुई जना युवाले निर्वस्त्र बनाएर छोरीलाई बलात्कार गर्दै गरेको भेटेको उनले वताए। ‘राति कामबाट घर फर्कँदै गर्दा दुई युवकले एक बालिकालाई कपडाले मुख छोपेर घिसार्दै लगेको देखेको थिएँ। तर, मैले वास्ता गरिन। घर पुग्दा आफ्नी छोरी नदेखेपछि खोजी गर्नेक्रममा त्यस्तो देख्नु पर्यो’–पीडित बालिकाका बुबाले भने।

आफूले लठ्ठीले हानेर उनीहरुलाई खेदेको र एक युवक घाईते पनि भएको उनको भनाई छ। ती युवकको खुट्टामा चोट लागेको उनले बताए। नाबालिका छोरीमाथि अत्याचार गर्ने उपर आफूले कुटपिट गर्दा प्रहरीले उल्टै आफुलाई एक दिनभर हिरासतमा राखेको उनले गुनासो गरे।

जिल्ला प्रहरी कार्यालय महोत्तरीका डीएसपी सन्तुलालप्रसाद जयसवारले घट्नाको विषयमा अनुशन्धान भईरहेको वताए। बालिकाको प्रादेशिक अस्पताल जलेश्वरमा स्वास्थ्य जाँचलगायतको प्रक्रिया अघि बढाएको बताउँदै उनले आवश्यक सबै कानुनी प्रक्रिया भइरहेको जानकारी दिए।

आरोपी मध्ये एक जनाको प्रहरीको निगरानीमा खुट्टाको उपचार भईरहेको र एक जना फरार रहेको जयसवारले वताए। प्रहरीका अनुसार आरोपित दुबै नाबालक हुन।

एक साता अघि महोत्तरीमै एक बालिकालाई बलात्कार गरेको आरोपमा जलेश्वर नगरपालिकाका १७ वर्षीय किशोर पक्राउ परेका छन्। बालिकाका अभिभावकको जाहेरीपछि प्रहरीले आरोपीलाई सोमबार घरबाटै पक्राउ गरेको हो।

आइतबार अपराह्न आरोपितले घरबाहिर खेलिरहेकी बालिकालाई घरको भान्सा कोठामा लगेर बलात्कार गरेको आरोप छ।