काठमाडौँ– हात्तीपाईले रोगले थला परेकी श्रीमतीलाई अलपत्र छोडेर गर्लफ्रेण्ड (गुप्त श्रीमती)लाई लिएर विदेश भ्रमणमा गएको भन्दै अहिले केपी शर्मा ओली नेतृत्वको सरकारका मन्त्री शरदसिंह भण्डारीको आलोचना भईरहेको छ।

गत कात्तिकको अन्तिम साता मन्त्री भण्डारीले स्पेनको म्याड्रिड भ्रमण गर्दाको प्रसंग हो यो। भ्रमणको विषयमा मन्त्रीको आलोचना भईरहेका बेला सोही भ्रमणका अन्य आश्चर्यजनक तथ्यहरुसमेत सार्वजनिक भएका छन्।

‘टुवार्ड अ लेबर इन्टरनेशनल’ नामको कार्यक्रमका भाग लिने नाममा श्रम रोजगार तथा सामाजिक सुरक्षा मन्त्री भण्डारीले गर्र्लफ्ेण्ड निर्जला राउतलाई विदेश घुमाउने योजना बनाएपछि कर्मचारीलाई खुदो परेको छ। मन्त्रीको कमजोरीका कारण त्यसको फाईदा मन्त्रालयका कर्मचारीले समेत उठाएको पाईएको छ।

भण्डारीले मन्त्रीस्तरबाट निर्णय गराएर पूर्वसांसदसमेत रहेकी निर्जलालाई लाने भएपछि मन्त्रालयका सहसचिव सूर्यबहादुर खत्रीले श्रीमती मिट्टु थापा र उपसचिव कविराज उप्रेतीले श्रीमती शोभा रिजाललाई भ्रमण दलमा सामेल गराएका थिए।

भ्रमणमा जाने तीन जोडीको नाम फाईनल भएपछि कन्सुलर सेवा विभागलाई पत्र लेख्न शाखा अधिकृत आयुषी भट्टराईलाई जिम्मा दिईएको थियो। अन्तिम समयमा उनले आफ्नोसमेत नाम टोलीमा राखेर विभागलाई पत्र लेखिन्। तर, उनी भने जोडी विनै भ्रमणमा गएको खुलेको छ। उनी अविवाहित हुन वा अन्य कुनै कारणले भ्रमण दलमा एक्लै परिन भन्ने खुलेको छैन।

विदेशमा हुने महत्वपूर्ण कार्यक्रममा सम्बिन्धत क्षेत्रका विज्ञ वा जानकारहरुलाई लाने परम्पारा छ। तर, राज्यको प्रतिनिधित्व गर्ने मन्त्रीदेखि कर्मचारीसम्मले यसरी पारिवारिक भ्रमण गरेपछि सर्वत्र आलोचना भईरहेको छ।

मुलुकमा अहिले आर्थिक मन्दी चलिरहेको छ। राजस्वले कर्मचारीलाई तलब खुवाउन पुग्ने अवस्था छैन। सामाजिक सुरक्षा भत्ता खुवाउन नपुग्ने हो कि भन्ने चिन्ता छ। वजेट अभावका कारण विकास निर्माणका काम अलपत्र परेका छन्। यस्तो बेलामा अनावश्यक विदेश भ्रमण र फजुल खर्च रोक्नुपर्ने अवस्थामा मन्त्री र मन्त्रालयका कर्मचारीहरु नै यसरी मोजमस्तीमा लागेको खुलेपछि सर्वसाधारण आश्चर्यमा छन्।