फरार भनिका दुर्गा प्रसाईं मन्दिरमा, प्रहरीसँग माफी मागे

काठमाडौँ– काठमाडौँको तीनकुनेमा हिंसा भड्काएर फरार भएका मेडिकल व्यवसायी दुर्गा प्रसाईं आज एकाएक फेसवुक लाईभमा आएका छन्। एउटा सानो मन्दिरको अगाडि वसेर फेसवुकमा आएका उनले आफू नभागेको र काठमाडौंमै रहेको दाबी गरेका छन्।

उनले फरक–फरक स्थानबाट फरकफरक भिडियो सन्देश जारी गरेका छन्। सारमा उनले आफू भाग्ने मान्छे नभएको दाबी गर्दै प्रधानमन्त्रीले गोली हान्ने आदेश दिएपछि आफु मन्दिरमा सुरक्षित रहेको जानकारी दिएका छन्।

‘दुर्गा प्रसाईं तपाईंहरूबाट टाढा छैन। म भागेको छैन। म भाग्दिनँ। म सुरक्षित मात्र बसेको हो। म नेपाल र नेपाली छाडेर भाग्दिनँ। म कुनै काठमाडौंको एउटा मन्दिरमा छु।’ आफूलाई सरकारले टार्गेट बनाएको दाबी गरेका प्रसाईंले कानको छेवैबाट गोली गएपछि सुरक्षित रहनका लागि ब्यारिकेड तोडेको दाबी गरेका छन्।

प्रसाईंले तीनकुनेको प्रदर्शनका क्रममा प्रहरीको घेरालाई गाडीले पेल्दै अघि बढेका थिए। सो क्रममा उनले कयौं पटक अश्लील शब्द पनि प्रयोग गरेका थिए। उनलाई प्रहरीले अहिले पनि खोजी गरिरहेको छ। यसबारे उनले प्रहरीसँग माफी माग्दै आफूजति प्रहरी र दिनदुखीलाई माया गर्ने मान्छे कोही नभएको पनि बताएका छन्।

‘म आफू सुरक्षित हुन सुरक्षाकर्मीको घेरा तोडेको हुँ। तपाईंहरूप्रति लक्षित दुष्मनी होइन।’ उनले भनेका छन्। तपाईंहरूलाई पर्न गएको चोटप्रति क्षमा चाहन्छु।’ उनले भनेका छन्–‘मेरो कानको छेवैबाट गोली गयो। मैले कुरो बुझिसकेपछि मेरै गाडीमा अश्रुग्यास उत्रिएपछि यस्तो भएको हो। मलाई मार्ने योजना बुनेको थाहा पाएपछि प्रहरीको घेरा तोडेको हुँ।’

शान्तिपूर्ण आन्दोलनमा राज्यले दमन गरी स्टेजमै पुग्न नदिएको उनको दाबी छ। आफूलाई पक्राउ र पूर्वराजालाई नजरबन्दमा राख्न चुनौती दिएका छन्।

यता, प्रसाईँ फरार र नवरराज सुवेदी नजरबन्दमा परेपछि राजावादीहरूले आन्दोलनको नेतृत्व गर्न डा. जगमान गुरुङलाई अघि सारेका छन्। राजावादी मोर्चाका संयोजनक नवराज सुवेदीले एउटा विज्ञप्ति निकालेर अबदेखि त्यसको जिम्मेवारी गुरुङलाई दिइएको बताएका छन्।

‘सरकारले मलाई नजरबन्दमा राखेको हुनाले मेरो अनुपस्थितिमा संयुक्त जनआन्दोलनको नेतृत्व नेपाल ऋषि जगमानले गर्नुहुनेछ’ उनले भनेका छन् ‘आन्दोलन निरन्तर राख्न सबै दल, संघसंस्थालाई सहयोग गर्न आह्वान गर्दछु।’


प्रतिक्रिया

Leave a Reply

Your email address will not be published. Required fields are marked *

लोकप्रिय

ताजा अपडेट