इटहरी– एसइईमा ह्वाट्सएममा ग्रुप बनाई चिट चोराएको आरोपमा सुनसरीको इनरुवा–९ स्थित सरस्वती मावि परीक्षा केन्द्रका २ जना गार्डलाई निस्कासन गरिएको छ।

सोमबार गणित विषयको परीक्षा चलिरहँदा ‘ह्वाट्सएप’ मार्फत चिट चोर्न सहयोग गरेको रङ्गेहात पक्राउ परेपछि उनलाई निस्कासन गरिएको हो। शिक्षकहरु श्रवणकुमार चौधरी र रमानन्द मेहतालाई परीक्षा गार्डबाट निष्कासन गरिएको सुनसरीका सीडीओ धर्मेन्द्रकुमार मिश्रले वताए।

सीडीओ मिश्रका अनुसार अनुगमन टोलीलाई देखेपछि गार्डले मोबाइल अफ गरेका थिए। उनीहरूको मोबाइल जाँच गर्दा चिट चोर्न र चोराउन ह्वाट्सएप मार्फत च्याट गरिएको भेटिएको थियो।

त्यसैगरी इनरुवा–१ स्थित भगवती मावि परीक्षा केन्द्रबाट इनरुवा–५ का मुकेन्द्र यादव, रमानन्द यादव र दिनेशप्रसाद यादवलाई गार्डबाट निस्कासन गरिएको सुनसरीका एसपी सुमन तिम्सिनाले जानकारी दिए।

सोमबार विद्यार्थीबाट जनही १० हजार रकम लिने दुई जना गार्डलाई दुहवीबाट सीडीओगले गार्डबाट हटाएका थिए। बिहीबार दुहबीको सरस्वती माध्यमिक विद्यालय र गढीको सरस्वती माध्यमिक विद्यालयबाट दुई÷दुई जना गार्डलाई निष्कासन गरिएको थियो।

सुनसरीका ५० परीक्षा केन्द्रमा १३ हजार ५७३ परीक्षार्थी एसईईमा सहभागी भएका छन्।