१५ वर्षीय किशोरसँग सम्बन्ध राखेको स्वीकार गर्दै आइसल्यान्डकी मन्त्रीले दिईन राजीनामा
शीर्ष खबर 
काठमाडौँ– ३६ वर्षअघि आफुभन्दा ७ वर्ष कान्छा १५ वर्षीय एक किशोरसँग सम्बन्ध रहेको आरोप स्वीकार गर्दै आइसल्यान्डकी बाल विकासमन्त्री आस्थिल्डुर लोआ थोर्सडोटिरले पदबाट राजीनामा दिएकी छन्।
मन्त्री आस्थिल्डुर लोआ थोर्सडोटिरले मिडिया अन्तर्वार्तामा आफू २२ वर्षको हुँदा १५ वर्षको किशोरसँग सम्बन्ध भएको स्वीकार गरेकी हुन्। त्यतिबेला आफु धार्मिक समूहमा सल्लाहकारका रूपमा कार्यरहत रहेको र ती किशोर त्यहाँ आउने गरेको उनले जनाएकी छिन्।
त्यस क्रममा उनीसँग आफ्नो शारीरिक सम्बन्ध भएको र बच्चासमेत जन्मिएको उनले बताएकी छन्। ‘यो ३६ वर्ष पुरानो कुरा हो, यसबीच धेरै परिवर्तन भइसकेका छन्’, आस्थिल्डुरले मिडियासँग भनेकी छन्, ‘यदि यो अवस्था आज भएको भए म यसलाई पूर्ण रूपमा फरक तरिकाले सम्हाल्थेँ।’
आइसल्यान्डकी प्रधानमन्त्री क्रिस्ट्रुना मोल फ्रोस्टाडोटिरले मिडियासँग यो धेरै गम्भीर विषय भएको बताइन्। तर यस विषयमा सर्वसाधारण जति जानकारी छ, आफूलाई पनि त्यति मात्र भएको दाबी गरिन्। ‘यो एकदमै व्यक्तिगत मामिला हो र सम्बन्धित व्यक्तिको सम्मान गर्दै म यसमा टिप्पणी गर्दिनँ।’– उनले भनेकी छिन्।
आइसल्यान्डको भिसिर अखबारका अनुसार, आइसल्याण्डकी प्रधानमन्त्री क्रिस्ट्रुनाले बिहीबार राति समाचारको पुष्टि भएको बताइन्। यसपछि उनले तुरुन्तै बाल विकास मामिला मन्त्रीलाई आफ्नो कार्यालयमा बोलाइन् र यसपछि मन्त्रीले राजीनामा दिइन्।
