एसईई अमर्यादित बनाएको आरोपमा सप्तरीका २ केन्द्राध्यक्षसहित २६ जनालाई कारबाही
शीर्ष खबर 
राजविराज– सप्तरी एसईई परीक्षामा अमर्यादित क्रियाकलाप गर्ने दुई जना केन्द्राध्यक्ष कारवाहीमा परेका छन्।
जिल्ला परीक्षा सुरक्षा समितिका अध्यक्षसमेत रहेका सप्तरीका सीडीओ भोला दाहाल नेतृत्वमा खटिएको अनुगमन टोलीले उनीहरुलाई कारबाही गरेको हो।
विष्णुपुर गाउँपालिका स्थित जनता माध्यमिक विद्यालय इटहरी विष्णुपुरका केन्द्राध्यक्ष र हनुमाननगर कंकालिनी नगरपालिकास्थित महावीर माध्यमिक विद्यालय हनुमाननगरका केन्द्राध्यक्षलाई कारबाही गरिएको सीडीओ दाहालले वताए।
विष्णुपुरमा एउटा कोठामा एकै विद्यालयका परीक्षार्थी राखेर परीक्षा दिलाईरहेको पाईएपछि केन्द्राध्यक्ष, सहायक केन्द्राध्यक्ष र ६ जना निरीक्षकलाई कारबाही गरिएको उनले बताए।
यसैगरी हनुमाननगरमा केही कक्षाकोठाबाट १० वटा प्रश्नको उत्तरसमेत लेखिएको चिट बरामद भएपछि केन्द्राध्यक्ष, २ जना सहायक केन्द्राध्यक्ष र १५ जना निरीक्षकलाई कारबाही गरिएको हो।
उनीहरुलाई कारवाही गर्न शिक्षा विकास तथा समन्वय इकाइमा लेखेर पठाइसकेको र नयाँ केन्द्राध्यक्षसमेत तोकिएको सीडीओ दाहालले जानकारी दिए।
यस वर्ष सप्तरीमा ९० सामुदायिक विद्यालय र ५२ संस्थागत विद्यालय गरि १ सय ४२ विद्यालयका ८ हजार ७ सय १५ विद्यार्थी एसईईमा सहभागी भएका छन्। जसमा साधारण तर्फबाट ७ हजार ८ सय ४८, प्राविधिकतर्फ ३ सय ९ र ग्रेडबृद्धि तर्फबाट ५ सय ५८ विद्यार्थी छन्।
परीक्षाका लागि ३७ वटा परीक्षा केन्द्र निर्धारण गरिएको छ।
