राजविराज— बिहीबारदेखि सुरु भएको माध्यमिक शिक्षा परीक्षा (एसईई) मधेशका जिल्लाहरुमा पूर्णतया अमर्यादित देखिएको छ। परिक्षाको पहिलै दिन (अंग्रेजी विषय) खुलेआमा चोरीका घट्ना देखिएका छन् भने परिक्षा सुरु हुनासाथ प्रश्नपत्र बाहिरिएको छ।

चिट चोर्दै र चोराउँदै गरेका भीडीओ सामाजिक सञ्जालमा छ्यास्छ्यास्ती देखिएका छन्। रौतहटको मौलापुर नगरपालिका–६ स्थित श्री माध्यमिक विद्यालय परीक्षा केन्द्रमा काँडे तार लगाइएको पर्खालमा चढेर पहिलो तलाको झ्यालबाट चिट पु¥याइएको भिडिओ सामाजिक सञ्जालमा भाईरल भईरहेको छ।

कालो हाफ टि–सर्ट लगाएका एक युवकले पर्खालमा चढेर झ्यालबाट दिएको चिट परीक्षार्थीले धकै नमानि लिएको भिडिओमा स्पष्ट देखिन्छ। यसैगरी, महोत्तरीको औरहीस्थित एक परीक्षा केन्द्रमा नजिकै रहेको घरको छत हुँदै विद्यालयको भवनको बार्दलीमा पुगेर झ्यालबाट चिट पुर्‍याइएको भिडिओ पनि बाहिरिएको छ।

यतिमात्रै होईन, धनुषामा परिक्षा सुरु भएको एक घण्टाभित्रै प्रश्न पत्र आउट भएको छ। कुन परिक्षा केन्द्र र को मार्फट प्रश्नपत्र वाहिरियो भन्ने खुलिसकेको छैन। तर, परीक्षा सुरु भएको १ घण्टाभित्रै समाजिक सञ्जालमा छताछुल्ल भएको थियो। ‘आरई १०११ एमपी’ कोड गरिएको प्रश्नपत्र बाहिरिएको थियो।

धनुषाका सीडीओ रामुराज कडरियाले भने प्रश्नपत्र धनुषाबाटै वाहिरिएको भन्ने विषय यकिन भई नसकेको र अनुशन्धान भईरहेको वताएका छन्।