विराटनगर– मोरङमा दुई सन्तानकी आमालाई हातखुट्टा बाँधेर बलात्कार गरेको आरोपमा प्रहरीले तीन जनालाई पक्राउ गरेको छ। पक्राउ पर्ने कटहरी गाउँपालिका–२ का १९ वर्षीय मोहम्मद रमजान, १९ वर्षीय सोनुकुमार साह र भारतको अररीया कुशाकट्टाका १९ वर्षीय मो गुल्जार छन्।

उनीहरु माथि मंगलबार दिउँसो जहदा गाउँपालिका–३ की २३ वर्षीय महिलालाई हातखुट्टा बाँधेर बलात्कार गरेको आरोप छ। मंगलबार घरदेखि करिब २ किलोमिटर टाढा कटहरी गाउँपालिका–२ मा पर्ने खेतको बीचमा रहेको बाँसको झ्याङमा ती महिला अचेत अवस्थामा फेला परेकी थिईन।

मुख सलले थुनिएको र हातखुट्टा बाँधेको अवस्थामा स्थानीयले भेटिएपछि प्रहरीलाई खबर गरेका थियो। प्रहरीले उनको उद्धार गरी उपचारका लागि विराटनगर स्थित कोशी अस्पतालमा भर्ना गराएको छ। महिलाको स्वास्थ्य अवस्था सुधारोन्मुख छ।

उनले प्रहरीलाई बताए अनुसार घरबाट शौच गर्न निस्किएका बेला तीन जनाको समूहले सिटी सफारीमा राखी कटहरी–२ स्थित बाँस झ्याङमा लागेर हातखुट्टा बाँधेर बलात्कार गरेका थिए। उनकै बयानका आधारमा ३ जना पक्राउ परेका हुन।