विराटनगर — मोरङमा मर्निङवाकमा निस्किएकी २२ वर्षीया युवतीमाथि सामूहिक बलात्कार भएको छ। मंगलबार विहान विराटनगर महानगरपालिका नजिकैको कटहरी गाउँपालिका– २ मा उनीमाथि यो दुर्घटना भएको हो।

युवतीलाई बाँसको झ्याङमा लगेर हातखुट्टा बाँधी मुखमा पट्टी लगाएर सामूहिक बलात्कार गरिएको पीडितको बयानलाई उद्धृत गर्दै प्रहरीले जनाएको छ। युवतीलाई दिउँसो कटहरी गाउँपालिका–२ स्थित धानखेतको बीचमा रहेको बाँसको झ्याङभित्रबाट अर्धचेत अवस्थामा उद्धार गरिएको छ।

करिब ११ बजे पराल लिन गएकी महिलाले देखेपछि उनको उद्धार गरिएको थियो। उनलाई उपचारका लागि विराटनगरस्थित कोशी अस्पतालमा भर्ना गरिएको मोरङ प्रहरीका डीएसपी बेदप्रकाश जोशीले जानकारी दिए। उनको स्वास्थ्य अवस्थामा सुधार हुँदै गएको छ।

प्रारम्भिक अनुसन्धानमा युवतीमाथि सामूहिक बलात्कार भएको पुष्टि भएको उनले वताए। युवती जहदा गाउँपालिका–३ की बासिन्दा हुन्। प्रहरीका अनुसार ऋषिदेव थरकी ती महिलाका दुई सन्तान छन्। श्रीमानसँग सम्बन्ध बिग्रिएपछि उनी माइतमा बस्दै आएकी थिइन्।

प्रहरीले घट्नाको अनुशन्धान सुरु गरेको छ भने संलग्नहरुको खोजी भईरहेको डीएसपी जोशीले जानकारी दिए।