काठमाडौँ– खोटाङको रूपाकोट मझुवागढी नगरपालिका– १ घर भएका ५६ वर्षीय कूलप्रसाद आचार्य र उनका छोरा २२ वर्षीय प्रवीन आचार्य भक्तपुरमा मृत फेला परेका छन्। उनीहरुको हत्या भएको आशंका छ।

सूर्यबिनायक नगरपालिका–२, बालकोट फिकाधारास्थित एउटा साढे तीन तले घरमा उनीहरुलाई सोमबार बिहान मृत फेला पारिएको हो। घरको तल्लो तलामा दुई वटा छुट्टाछुट्टै कोठामा उनीहरू मृत फेला परेका थिए।

जिल्ला प्रहरी परिसर भक्तपुरका डिएसपी ढुण्डीराज न्यौपानेका अनुसार दुवै कोठा बाहिरबाट ताला लगाइएको थियो। उनीहरूमाथि धारिलो हतियार प्रयोग पाइएको प्रहरीले जनाएको छ। कोठाभित्र अचेत अवस्थामा रहेको भन्दै स्थानीयले खबर गरेपछि प्रहरी परिसर भक्तपुर र प्रहरी वृत्त ठिमीबाट टोली खटिएको थियो।

घट्नाको विषयमा अनुशन्धान भईरहेको डीएसपी न्यौपानेले जानकारी दिए।