जनकपुर– रामसीताको विवाह महोत्सवमा सहभागी भएर घर फर्किदै गरेका दम्पत्ति मध्ये मोटरसाईकल दुर्घटनामा पतिको मृत्यु भएको छ। पत्नि घाईते छिन्।

जनकपुरधाम–धनुषाधाम सडक खण्ड अन्तर्गत थुमौना भन्ने स्थानमा शुक्रबार साँझ ज ८ प ३४७७ नम्बरको मोटरसाइकल अर्को मोटरसाईकलसँग ठोक्किएर दुर्घटना भएको थियो। उक्त दुर्घटनामा सबैला नगरपालिका–२ का ४५ वर्षीय रामनारायण साहको मृत्यु भएको हो। उनकी पत्नी उषा घाईते छिन्।

दुर्घटनामा टाउकोमा चोट लागेका रामनारायण र उषालाई उपचारका लागि जनकपुर प्रादेशिक अस्पतालमा लगिएको थियो। रामनारायणको उपचारका क्रममा मृत्यु भएको र उषालाई उपचारपछि घर लगिएको जनाईएको छ।

मृतक साह सबैला उद्योग वाणिज्य संघको सदस्य तथा सबैला स्थित गोकुल हार्डवेयरका सञ्चालक थिए। प्रहरीका अनुसार दम्पत्ति सवार मोटरसाईकल विपरित दिशाबाट आउँदै गरेको ज ११ प ६८५६ नम्बरको मोटरसाइकलसँग ठोक्किएको थियो।

साहलाई ठक्कर दिने मोटरसाईकलका चालक सबैला नगरपालिका १ का १८ वर्षीय सिद्धार्थ साह पक्राउ परेका छन्।