काठमाडौँ– बागलुङको जैमिनी ७ हर्देवामा पिकअप भ्यान दुर्घटना हुँदा मृत्यु भएका ५ जनाकै सनाखत भएको छ।

मृत्यु हुनेमा जीपका चालक बागलुङ जैमिनी–८ छिस्ती केवैका महेन्द्र पुन (३८), सोही ठाउँका रश्मी श्रीष (२०), नन्दकली पुन (५०), निरज श्रीष (१७) र कुलप्रसाद श्रीष (७५) छन्।

भ्यानमा सवार ६ जनामध्ये गङ्गाबहादुर श्रीष (४५) घाइते छन्। उनको धौलागिरी अस्पतालमा उपचार भईरहेको छ। प्रहरीका अनुसार मृतक र घाईते एउटै गाउँका हुन।

जिल्ला प्रहरी कार्यालका इन्स्पेक्टर केशव थापाका अनुसार जैमिनी नगरपालिका–८ छिस्तीबाट सदरमुकाम बागलुङ बजार जाँदै गरेको ग २ च ९२४७ नम्बरको पिकअप भ्यान आज बिहान साढे ८ बजे दुर्घटना भएको थियो।

भ्यान सडकबाट करिब ४ सय मिटर तल खसेको छ। यो घटनाले जैमिनी–८ को केवै गाउँ शोकमा डुबेको छ।