जनकपुर– सर्लाहीको बरहथवा बजारमा गएराति भीषण आगलागी भएको छ। बरहथवा नगरपालिका–७ का किसुन दासको घरमा रहेका पसलहरुमा आगलागी भएको हो। आगलागीबाट करिब ३ करोड बराबरको क्षति भएको छ।

आगलागीबाट राजवीर होलसेल किराना पसल, आलु भण्डार र कपडा सिलाउने पसलमा क्षति पुगेको इलाका प्रहरी कार्यालय बरहथवाले जनाएको छ। प्रहरीका अनुसार नरेश साहको किराना पसलमा धेरै क्षती भएको छ।

चाडपर्वका लागि धेरै सामग्री गोदाम गरेर राखिएकाले आगलागीबाट सोही पसलमा बढी क्षति पुगेको डीएसपी गौतम थापाले जानकारी दिए। शुक्रबार राति करिव साढे ११ बजे शुरु भएको आगलागी राति २ बजेपछि मात्रै नियन्त्रणमा आएको थियो।

हरिवन नगरपालिकाको दमकल, प्रहरी र स्थानीययको सहयोगमा आगो निभाईएको डीएसपी थापाले बताए। आगलागी कसरी सुरु भयो भन्ने खुलेको छैन।