नाइजेरियामा बससँग ठोक्किएर इन्धन ट्यांकर विस्फोट, ५२ जनाको मृत्यु
शीर्ष खबर 
काठमाण्डौं– नाइजेरियामा यात्रु र पशुचौपाया बोकेको ट्रकसँग इन्धन बोक्ने ट्यांकर ठोक्किँदा ५२ जनाको मृत्यु भएको छ। उक्त दुर्घटनामा अन्य दुई सवारी साधन, एउटा क्रेन र एउटा पिकअप भ्यान पनि दुर्घटनाग्रस्त भएका छन्।
नाइजर स्टेट इमर्जेन्सी म्यानेजमेन्ट एजेन्सी (सेमा) का प्रवक्ता इब्राहिम हुसेनीले घटनाबारे जानकारी दिए। ‘इन्धन लोड गरिएको पेट्रोल ट्यांकर यात्रु र गाईवस्तु बोकेको ट्रेलर ट्रकसँग ठोक्किँदा यो घटना भएको हो,’ सेमाले जारी गरेको विज्ञप्तिमा भनिएको छ।
अफ्रिकाको सबैभन्दा बढी जनसंख्या भएको देशमा इन्धन ट्यांकर विस्फोट हुँदा पटक–पटक ठूलो संख्यामा मानवीय क्षति हुने गरेको छ। इन्धन ट्यांकरको दुर्घटनापछि स्थानीयले जोखिम लिई चुहिएको इन्धन चोर्ने प्रयास गर्दा आगलागी हुने र यसबाट ठूलो संख्यामा मानवीय क्षति हुने गरेको पाइन्छ।
सडकको खराब अवस्था, पूराना सवारी साधन र चालकको लापरबाहीका कारण अफ्रिकामा यस्ता दुर्घटना हुने गरेको पाइन्छ।
