काठमाण्डौं– दाङको घोराहीस्थित महेन्द्र बहुमुखी क्याम्पसमा विहिबार सुतली बम पड्काएर भाग्न खोज्ने दुई जनालाई प्रहरीले पक्राउ गरेको छ। उनीहरुले ‘रमाइलोका लागि पटका पड्काएको’ बयान प्रहरीलाई दिएका छन्।

बिहान रा ८ प ३३२३ नम्बरको मोटरसाइकलमा आएका घोराही उपमहानगरपालिका–१५ निवासी अभियान थापा र सोही क्याम्पसमा पढ्ने सुदन कार्कीले क्याम्पस परिसरमा बम पड्काएर भागेका थिए। प्रहरीले उनीहरुलाई भाग्दाभाग्दै पक्राउ गरेको हो।

जिल्ला प्रहरी कार्यालयका दाङका डीएसपी रामप्रसाद तिमल्सिनाका अनुसार दुई जनाले क्याम्पसको पर्खाल नजिकै जुटको बोरामा राखेको सुतली बम फालेका थिए। बम बिस्फोट हुँदा चर्को आवाज आएको थियो, कुनै क्षति भने नभएको उनको भनाई छ।

यस विषयमा थप अनुसन्धान भइरहेको तिमल्सिनाले जानकारी दिए। उनका अनुसार मोटरसाइकलमा आएका दुई जनामध्ये थापाले क्याम्पस अगाडि सडकमा बम फालेको खुलेको छ।