गोठमा सुतेका वृद्धको धानबारीमा हत्या, गाँजा हुनसक्छ हत्याको कारण
शीर्ष खबर 
जनकपुर– रौतहटको गौरमा एक ७४ वर्षीय वृद्धको हत्या भएको छ। गौर नगरपालिका–५, कोइरीटोलका वृद्ध अनिरुद्ध महतोको शव बुधबार बिहान उनी सुत्ने गरेको गोठबाट करिव २ सय मिटर पूर्व धानखेतमा फेला परेको छ।
महतोको धारिलो हतियार प्रहार गरी हत्या भएको प्रहरीको प्रारम्भिक अनुसन्धानबाट खुलेको छ। बुधबार बिहान साढे ८ बजे महतोको शव फेला परेको जिल्ला प्रहरी कार्यालयकी डिएसपी एलिजा गिरीले जानकारी दिइन्।
उनकाअनुसार मृतक महतोको हात र पेटमा चोट छ। घटनास्थलबाट कुनै हतियार फेला परेको छैन। मृतक सोही खेतनजिकै रहेको एक पक्की गोठमा बस्ने गर्थे भने घरमा छोरा–बुहारी बस्ने गरेका थिए। छोरावुहारी वस्ने घरमै खाना खाने गरेका महतो सुत्न भने गोठमा जाने गरेका थिए।
मंगलबार बेलुका पनि खाना खाएर गोठमा सुत्न गएका महतोको आज विहान खेतमा शव भेटिएको डीएसपी गिरीले बताईन। मृतक लागुऔषध सेवनकर्ता र कारोबारमा समेत संलग्न भएको हुन सक्ने उनको आशंका छ।
मृतकको शरीरमा भएको कपडामा प्लास्टिकका साना पोकामा गाँजा फेला परेको छ भने उनी सुत्ने कोठामा पनि त्यस्तै गाँजाका पोका फेला परेका छन्। प्रहरीले घटनाको अनुसन्धान गरिरहेको गिरीले बताईन।
